15 лістапада насельніцтва Зямлі, паводле падлікаў Арганізацыі Аб’яднаных Нацыяў, дасягнула васьмі мільярдаў чалавек. Пра гэта паведаміла прэс-служба арганізацыі.
«Гэта гістарычная вяха ў развіцці чалавецтва», – адзначаюць у ААН і ўдакладняюць, што для павелічэння насельніцтва Зямлі на адзін мільярд спатрэбілася 12 гадоў.
Такі рост, паводле арганізацыі, стаўся магчымы дзякуючы павелічэнню працягласці жыцця людзей, які, у сваю чаргу, тлумачыцца паляпшэннем грамадскай аховы здароўя, харчавання і асабістай гігіены, а таксама высокімі і ўстойлівымі ўзроўнямі нараджальнасці ў некаторых краінах свету, а менавіта ў Азіі ды Афрыцы.
Як адзначае ААН, самы высокі ўзровень нараджальнасці фіксуецца, як правіла, у краінах з нізкімі паказнікамі даходу на душу насельніцтва, то бок глабальны прырост насельніцтва канцэнтруецца ў найбяднейшых краінах свету.
Паводле прагнозаў ААН, насельніцтва Зямлі вырасце да 2030 года да 8,5 мільярда чалавек, а да 2037 года – да 9 мільярдаў. Арганізацыя прагназуе, што чалавецтва дасягне піку ў 2080 годзе, калі на Зямлі будзе 10,4 мільярда чалавек, і застанецца на такім узроўні да 2100 года.
У Беларусі на 1 студзеня 2022 года жылі 9 255 500 чалавек, гэта каля 0,1 % насельніцтва Зямлі і 1,3 % насельніцтва Еўропы, Беларусь займае 95-е месца ў свеце паводле колькасці насельніцтва.
Зміцер Міраш belsat.eu
