На Мазырскім нафтаперапрацоўчым заводзе гарэла помпавая ўстаноўка, паведамляе МНС у сваім Telegram-канале. Пажар патушылі, ніхто не пацярпеў.
15 кастрычніка ратавальнікі атрымалі паведамленне аб пажары на тэрыторыі Мазырскага нафтаперапрацоўчага заводу. Паводле звестак МНС, там гарэла помпавая камбінаваная ўстаноўка.
Пажар аператыўна патушылі, пацярпелых няма. Прычына ўзгарання высвятляецца.
Сёння ж супрацоўнікаў МНС выклікалі на пажар у жылым шматпавярховіку ў Горадні. Узгаранне там узнікла праз кароткае замыканне зарадкі мабільнага тэлефона.
БелТА піша, што гаспадары кватэры, калі былі на кухні, пачулі гук, падобны на ціхі выбух, прыбеглі ў пакой і пабачылі, што гарыць канапа. Яны выбеглі на вуліцу і пазванілі ратаўнікам.
У гэтым выпадку таксама ніхто не пацярпеў. Эвакуацыя жыхароў дому не спатрэбілася.
Сяргей Крот belsat.eu