65-гадовай Людміле Хлусевіч прысудзілі 1 год і 6 месяцаў «хатняй хіміі» за некалькі абразлівых слоў у «Аднакласніках» пад пастом пра ўчастковага з Вілейкі.
Справу разглядала суддзя Марыя Кацуба, дзяржабвіначванне прадстаўляла пракурорка Юлія Гародная, якая прасіла для Людмілы 2 гады «хатняй хіміі». 15 верасня суддзя агучыла прысуд – паўтары гады «хатняй хіміі».
Жанчыну пакаралі за тое, што пад адным з пастоў у сацыяльных сетках пра ўчастковага Міхаіла Жарыкава з Вілейкі пакінула каментар з аднаго слова: «Тварь».
Пацярпелы міліцыянт з Вілейкі Міхаіл Жарыкаў на суд не з’явіўся.
За апошнія паўгады пенсіянерка з анкалагічнаю хваробаю (у яе – лейкоз) перажыла ператрус, каля 10 допытаў, праверку ў адной крымінальнай справе і абвінавачванне ў другой.
У размове з «Белсатам» Людміла Хлусевіч распавяла, што яна прасіла суд звярнуць увагу на ейны ўзрост, хваробу, спадзявалася, што яе пашкадуюць.
– Але каму мы там патрэбныя. Я баюся, што не вытрымаю гэтую «хімію», – кажа пенсіянерка. – Я не магу гэта ўсё спакойна перажываць, у мяне падымаецца ціск. Увогуле, ціск моцна скача – то высокі, то нізкі такі, што я не магу хадзіць, галава кружыцца, за сцяну трымаюся. Так што не дарэмна я тады тую запіску напісала – адчуваю, што нешта са мной здарыцца. І яны будуць першымі, хто мяне знойдзе, бо будуць жа хадзіць да мяне штодня правяраць.
Людміла кажа, што для яе цяжка будзе хадзіць адзначацца, а адначасова ўсе выходныя сядзець удома – не выйсці ў краму, аптэку, да сяброў паразмаўляць, што важна для пенсіянеркі, бо яна жыве адна.
– Для мяне чым так жыць, дык лепш увогуле не жыць, – кажа Людміла. – Дажыць да такіх гадоў – і тлумачыць кожнаму свой крок, адпрошвацца, каб у Гомель з’ездзіць на лячэнне. Гэта такое прыніжэнне.
Людміла распавяла, што падчас суду даведалася, што з яе збіраюцца яшчэ спагнаць маральную кампенсацыю. Суму пакуль не агучвалі.
У жанчыны ёсць пяць дзён на апеляцыйную скаргу, але яна не ўпэўнена, што будзе гэта рабіць, бо гэта каштуе грошай і яна не верыць, што абскарджанне дасць нейкі вынік.
Крымінальны працэс над Хлусевіч пачаўся яшчэ 25 чэрвеня. Але ў сувязі з тым, што Людміла Хлусевіч падчас следства пісала перадсмяротную запіску, дзе прасіла ў выпадку яе заўчаснай смерці вініць ва ўсім дзяржаву, суддзя Кацуба прызначыла комплексную псіхолага-псіхіятрычную экспертызу.
На перадапошнім судовым пасяджэнні 13 верасня суддзя агучыла заключэнне экспертаў, якія прыйшлі да высновы, што падчас напісання абразлівых каментароў абвінавачаная не знаходзілася ў стане афекту і асэнсоўвала свае ўчынкі і магчымыя наступствы.
ГГ, belsat.eu
