Не толькі кандыдат на прэзідэнта. У Эквадоры забілі другога знанага палітыка за тыдзень
У Эквадоры 14 жніўня каля ўласнага дому застрэлілі аднаго з лідараў левага палітычнага руху «Грамадзянская рэвалюцыя» Пэдра Брыёнэса. За некалькі дзён да гэтага забілі кандыдата на прэзідэнта краіны.
Прадстаўніка «Грамадзянскай рэвалюцыі» Пэдра Брыёнэс застрэлілі каля ягонага дому ў горадзе Сан-Матэа. Паводле El Pais, палітыка застрэлілі невядомыя асобы на матацыклах, якія падпільнавалі яго ў засадзе. Брыёнэса даставілі ў лякарню, дзе канстатавалі смерць.
«Эквадор перажывае сваю самую крывавую эпоху. Гэтым мы абавязаныя ўсеагульнаму папушчальніцтву няўмелага ўраду і дзяржаве, захопленай мафіяй. Мае салідарныя абдымкі сям’і калегі Пэдра Брыёнэса, які загінуў у гэтым гвалце», – паведаміла ў «X» кандыдатка на прэзідэнта ад таго ж руху Люіса Гансалес.
Увечары 9 жніўня ў сталіцы Эквадору, Кіта, застрэлілі кандыдата на прэзідэнта Фэрнанда Віллявісэнсьё. Група невядомых тройчы стрэліла ў галаву палітыку. Медыкі канстатавалі ягоную смерць.
Паліцыянты здолелі затрымаць падазронага ў забойстве, ён быў паранены і ў выніку таксама памёр.
Датэрміновыя прэзідэнцкія і парламенцкія выбары пройдуць у Эквадоры 20 жніўня. Паводле апытанняў, найбольшыя шанцы на перамогу мае ўжо згаданая Люіса Гансалес. На другім месцы быў ужо забіты Віллявісэнсьё.
Якуб Хруст belsat.eu
