Як прайшоў першы дзень суда над палітзняволеным журналістам Дзянісам Івашыным
15 жніўня ў Гарадзенскім абласным судзе распачаўся суд над журналістам Дзянісам Івашыным, якога абвінавачваюць у здрадзе дзяржаве. Суд праходзіць у закрытым рэжыме. Дзяніса ў кайданках у калідорах будынку суда паказалі ў эфіры тэлеканалу «Беларусь 1».
На кадрах сюжэту Дзяніса Івашына вядуць у судовую залу два міліцыянты. Рукі журналіста ў кайданках за спінай.
На працэс прыехалі еўрапейскія дыпламаты – прадстаўнікі Чэхіі, Вялікай Брытаніі, Аўстрыі. Журналістка тэлеканалу «Беларусь 1» Ксенія Лебедзева падышла да часовага паверанага ў справах Аўстрыйскай Рэспублікі ў Рэспубліцы Беларусь Рональда Штурма і задавала пытанні пра тое, чаму Аўстрыя спансуе «тэрарызм ва Украіне і забойствы рускіх», што потым і паказалі ў эфіры.
Перад будынкам суда Лебедзева таксама падышла да маці Дзяніса Людмілы Івашынай і запыталася ў жанчыны, навошта яна там. Маці палітвязня адказала, што хоча ўсіх паслаць услед за рускім ваенным караблём.
Дзяніс Івашын быў затрыманы супрацоўнікамі КДБ 12 сакавіка 2021 году. Журналіста абвінавацілі ў здрадзе дзяржаве і супрацы з украінскай выведкай (ч.1 арт.356 КК РБ), а таксама ва ўмяшальніцтве ў дзейнасць супрацоўніка ўнутраных справаў (арт.365 КК РБ). Дзяніс знаходзіцца за кратамі ўжо 521 дзень. Палітвязню пагражае ад 7 да 15 гадоў зняволення.
Справу Івашына разглядае суддзя Валер Раманоўскі.
Дзяніс Івашын – гарадзенскі журналіст, вядомы расследаваннямі пра ўдзел беларускіх сілавікоў у баявых дзеяннях на ўсходзе Украіны ў складзе прарасейскіх фармаванняў, а таксама пра лёс чальцоў «Беркуту», якія ўцяклі з Украіны і служаць у беларускім АМАПе.
Марыя Міхалевіч belsat.eu
