Суд Маскоўскага раёну Менску 8 чэрвеня прыгаварыў брата былога супрацоўніка ГУБАЗіКу Станіслава Лупаносава Міхаіла да 2,5 гадоў «хіміі», паведамляе «Наша Ніва». Аб прысудзе стала вядома толькі праз тыдзень.
Мужчыну прызналі вінаватым на падставе ч. 2 арт. 216 УК РБ («Нанясенне маёмаснай шкоды без прыкметаў крадзяжу»). Яшчэ два крымінальныя артыкулы, паводле якіх першапачаткова абвінавачвалі Міхаіла, падчас суда былі знятыя.
Міхаіла Лупаносава сілавікі затрымалі 17 жніўня 2021 года. Ён быў дырэктарам будаўнічай фірмы. У СІЗА яго прымушалі на камеру асуджаць дзеянні брата і перадаваць заклікі «адумацца» ад былых калегаў.
Мужчыну адпусцілі ў зале суда. Абскарджваць прысуд ён не будзе.
Брат Міхаіла – экс-супрацоўнік ГУБАЗіКу Станіслаў Лупаносаў, падчас службы ён супрацоўнічаў з ініцыятывай «BYPOL», а ў снежні 2020 года з’ехаў ва Украіну. У Беларусі супраць яго распачалі крымінальную справу, а КДБ унёс яго ў спіс асобаў, якія маюць дачыненне да тэрарыстычнай дзейнасці.
Алена Рувіна belsat.eu
