Беларусы ўзялі ўдзел у міжнароднай цырымоніі з нагоды 77-й гадавіны вызвалення канцлагеру Маўтгаўзэн. Беларускую дэлегацыю ўзначаліў кіраўнік НАУ Павел Латушка, паведамляе тэлеграм-канал Народнага антыкрызіснага ўпраўлення.
Арганізатары цырымоніі не запрасілі да ўдзелу прадстаўнікоў амбасады Беларусі ў Аўстрыі з прычыны суўдзелу рэжыму Лукашэнкі ў агрэсіі супраць Украіны.
Дэлегацыю Беларусі на запрашэнне арганізатараў рэпрэзентавалі Павел Латушка, народныя пасольствы Беларусі ў Аўстрыі і Славеніі, беларуская дыяспара.
Дэлегацыя Беларусі прайшла пад нацыянальным бел-чырвона-белым сцягам і ўсклала вянок да помніку ахвярам канцлагеру.
«У канцлагеры нацысты ўтрымлівалі палітвязняў, што надае асаблівы сімвалізм удзелу прадстаўнікоў Беларусі ў цырымоніі. Сярод закатаваных у засценках былі і беларусы», – зазначае НАУ.
Адбылася таксама гутарка Паўла Латушкі са старшынём Міжнароднага фонду мемарыялу Вілі Мэрным (Willy Mernyi), які адзначыў, што выступае за неадкладнае вызваленне 1200 палітвязняў у Беларусі і абураны арыштамі сябраў незалежных прафсаюзаў.
На дзень 15 траўня ў Беларусі прызнаныя палітычнымі вязнямі 1200 чалавек.
ЗК belsat.eu