У Судане адбываюцца сутыкненні паміж Узброенымі сіламі і Сіламі аператыўнага падтрымання.
Страляніна і выбухі чутныя ў цэнтры Хартуму, побач са штабам арміі, Міністэрствам абароны і прэзідэнцкім палацам. Над горадам узнімаецца дым. Таксама ёсць звесткі пра страляніну каля будынку дзяржаўнага тэлебачання.
Сілы аператыўнага падтрымання заявілі аб захопе міжнароднага аэрапорту, рэзідэнцыі камандуючага арміі і прэзідэнцкага палацу ў Хартуме, паведамляе Reuters. Аднак пацверджання гэтай інфармацыі з незалежных крыніцаў пакуль няма.
Раней Сілы аператыўнага падтрымання абвінавацілі армію ў нападзе на адзін са сваіх лагераў. У сваю чаргу армія абвінаваціла Сілы аператыўнага падтрымання ў спробе захопу штабу, а таксама нападзе на армейскія лагеры ў Хартуме і іншых раёнах Судану.
Армейскае камандаванне заяўляе, што цяпер супрацьстаіць спробам праціўніка захапіць стратэгічныя аб’екты ў Хартуме.
«Al Jazeera» паведамляе, што Узброеныя сілы заявілі пра нанясенне авіяўдараў па лагерах Сілаў аператыўнага падтрымання.
Паводле BBC, канфлікт засяроджаны вакол запланаванага пераходу да цывільнага кіравання.
З 1989 да 2019 год Суданам кіраваў дыктатар Умар аль-Башыр, якому Міжнародны крымінальны суд выставіў абвінавачанне ў генацыдзе. У 2019 годзе ў выніку вайсковага перавароту рэжым аль-Башыра быў скінуты, дыктатара арыштавалі. У кастрычніку 2021 года ў краіне адбыўся новы пераварот, у выніку якога былі арыштаваныя некаторыя чальцы пераходнага ўраду.
Глеб Нержын belsat.eu