У Еўрапарламенце адбыліся дэбаты пра лёс беларускіх палітвязняў, па выніку якіх была прынятая рэзалюцыя з патрабаваннем вызвалення ўсіх палітычных зняволеных, зняцця з іх усіх абвінавачанняў і кампенсацыі нанесенай шкоды.
Увечары 13 снежня ў Еўрапейскім парламенце праходзілі дэбаты, падчас якіх дэпутаты выступілі з асуджэннем беларускага рэжыму і выказвалі падтрымку беларускім палітычным зняволеным.
З трыбуны гучалі прозвішчы найбольш вядомых беларускіх палітвязняў: Мікалая Статкевіча, Віктара Бабарыкі, Максіма Знака, Марыі Калеснікавай, Ігара Лёсіка, Паўла Севярынца, Паліны Шарэнды-Панасюк, Андрэя Пачобута і лаўрэата Нобелеўскай прэміі Алеся Бяляцкага.
Сярод выступоўцаў, якія звярталі ўвагу на тое, што беларускія палітвязні знаходзяцца ў невыносных умовах у засценках беларускіх турмаў, і патрабавалі ўвядзення санкцыяў у дачыненні да беларускага рэжыму за катаванні палітычных апанентаў у турмах, былі дэпутатка Эва Копач, Юозас Олекас, Гельмут Шольц і іншыя.
Па выніках дэбатаў была прынятая рэзалюцыя, у якой Еўрапарламент выступіў з патрабаваннямі неадкладнага вызвалення Міколы Статкевіча, ад якога няма звестак з турмы цягам 300 дзён, а таксама ўсіх 1500 палітвязняў, зняцця з іх абвінавачанняў і поўнай рэабілітацыі і фінансавай кампенсацыі нанесенай шкоды.
У рэзалюцыі прагучала настойлівае патрабаванне забяспечыць зняволеных належнай медычнай дапамогай, забяспечыць ім доступ да адвакатаў, сем’яў, дыпламатаў і міжнародных арганізацыяў. У дакуменце асуджаюцца палітычна матываваныя прысудаў і рэпрэсіі, якія працягваюцца ў Беларусі ў дачыненні да дэмакратычных сіл і грамадзянскай супольнасці.
Еўрадэпутаты выразілі цвёрдую салідарнасць з беларускім народам і дэмакратычнай апазіцыяй, заклікалі Еўразвяз падтрымаць палітзняволеных і іхныя сем’і, а таксама выступілі з заклікам дакументаваць міжнародныя злачынствы рэжыму і прыцягнуць да адказнасці ўсіх вінаватых у парушэннях правоў чалавека і ваенных злачынствах.
Раман Шавель belsat.eu