Ліберальная праваабаронца Наташа Пірц Мусар перамагла ў другім туры выбараў і сталася першаю жанчынаю на чале дзяржавы ў Славеніі. Яна заявіла, што будзе імкнуцца пераадолець глыбокі разрыў паміж левымі і правымі ў сваёй краіне, паведамляе агенцтва «Associated Press».
Пасля падліку амаль усіх галасоў Наташа Пірц Мусар апярэдзіла кансерватыўнага былога міністра замежных справаў Славеніі Анжэ Логара з лікам 54 % супраць 46 %.
Пірц Мусар заявіла, што будзе спрабаваць пераадолець раскол паміж левымі і правымі ў краіне з насельніцтвам 2 мільёны чалавек.
«Маёй першай задачай будзе адкрыццё дыялогу паміж усімі славенцамі», – падкрэсліла яна падчас святкавання сваёй выбарчай каманды.
Паведамляецца, што ейная перамога ўзмацняе ліберальны блок краіны пасля перамогі левацэнтрысцкай кааліцыі на парламенцкіх выбарах у Славеніі ў красавіку. «Усё сваё жыццё я адстойвала адныя і тыя ж каштоўнасці: дэмакратыю, правы чалавека, талерантнасць. Прыйшоў час перастаць мець справу з мінуўшчынаю. Шмат што трэба зрабіць у будучыні», – заявіла Пірц Мусар.
54-гадовая Наташа Пірц Мусар будзе першаю жанчынаю на пасадзе прэзідэнта пасля набыцця Славеніяй незалежнасці пасля распаду Югаславіі ў 1991 годзе. Пірц Мусар рэпрэзентавала былую першую лэдзі ЗША Мэланію Трамп у справах аб аўтарскіх правах і іншых пытаннях у Славеніі. Таксама яна была старшынёю Чырвонага Крыжа Славеніі.
Алена Рувіна belsat.eu
