Стала вядома, што «Беларусбанк» уводзіць абмежаванні для картак «Мір». Тэлеграм-канал «МотолькоПомоги» адзначае, што ўладальнікаў картак чакаюць абмежаванні на зняцце наяўных і камісія па выдачы наяўных.
Абмежаванні «Беларусбанку» датычаць кліентаў сістэмы «Мір» банкаў – нерэзідэнтаў Беларусі. З 14 чэрвеня ў «Беларусбанку» можна будзе здымаць не больш за 500 рублёў на тыдзень з картак расейскай плацежнай сістэмы. Таксама ўвялі камісію – 15 % ад сумы аперацыі для выдачы наяўных у банкаўскіх аддзяленнях.
Нагадаем, што гэта ўжо пяты банк, які ўвёў абмежаванні ўладальнікам картак расейскай плацежнай сістэмы. У «Белаграпрамбанку» і банку «Рашэнне» можна здымаць не больш за 500 рублёў за тыдзень, у «Белгазпрамбанку» і Банку БелВЭБ дзеюць месячныя ліміты – не больш за 2 і 2,5 тысячы рублёў штомесяц.
Таксама ў Беларусі адбылася міжсістэмная інтэграцыя плацежных сістэмаў «Белкарт» і «Мір». Для банкаў – удзельнікаў сістэмы «Белкарт» з 1 студзеня 2022 года ўстанавілі патрабаванне абслугоўваць карткі «Мір». Відавочна, што захады выкарыстання расейскай плацежнай сістэмы былі выкліканыя санкцыямі Захаду, накладзенымі пасля пачатку поўнамаштабнай вайны ва Украіне.
Раман Лугоўскі belsat.eu
