Рынак кватэраў у Менску працягвае перажываць бум. У лістападзе колькасць угодаў куплі-продажы чарговы раз пабіла рэкорд, паведамляе ў сваёй справаздачы Realt.
Агулам было падпісана 1690 угодаў. І няхай у кастрычніку іх было на 4,6 % больш, звесткі яшчэ будуць абнаўляцца. Апошні месяц восені дзявяты раз за бягучы год абнавіў гістарычны максімум.
З-за такога высокага попыту паступова скарачаецца і прапанова. У лістападзе колькасць выстаўленых абʼектаў зменшылася на 9 %. Тэндэнцыя можа працягнуцца, бо набліжаюцца святы.
Ці змяніліся кошты
Нягледзячы на невялікі перакос у бок попыту, цэны на кватэры ўпалі на 1,2 %, і квадратны метр у сярэднім каштуе $ 1385 (Br 4395).
Кошты змяніліся з-за танных новабудоўляў у Кастрычніцкім раёне. Цана аднапакаёўкі там ніжэйшая за рынкавую, з-за чаго і ўпала сярэдняе значэнне. У той жа час іншыя тыпы кватэраў падаражэлі.
У залежнасці ад метражу кошт кожнай асобнай кватэры бывае розны:
1-пакаёвыя: $ 1518 за 1 м² (0,3 % за месяц) – $ 52 500 (медыяна абсалютных коштаў)
2-пакаёвыя: $ 1319 за 1 м² (- 1,9 %) – $ 59 000
3-пакаёвыя: $ 1236 за 1 м² (- 1,7 %) – $ 75 250
4-пакаёвыя: $ 1187 за 1 м² (7,8 %) – $ 98 975.
Таксама ў справаздачы вылічылі кошты без прапановаў ад новабудоўляў. Сярэдні кошт «квадрата» стаў вышэйшы – $ 1536. Атрымаліся наступныя лічбы:
1-пакаёвыя – $ 1595 за 1 м² (1,3 % за месяц)
2-пакаёвыя – $ 1556 за 1 м² (- 0,1 %)
3-пакаёвыя – $ 1520 за 1 м² (- 1,2 %)
4-пакаёвыя – $ 1409 за 1 м² (2,6 %).
Што часцей за ўсё куплялі
Аднапакаёўкі і двушкі практычна зраўняліся ў папулярнасці. Доля першых скарацілася да 39 %, а другіх – паднялася да 36 %. Стабільна купляюць трохпакаёўкі – 20 %.
Набываць жытло ў новых дамах праблематычна – падводзяць тэмпы будаўніцтва. Такіх угодаў падпісалі ўсяго 6 %, таму менчукі працягваюць сяліцца ў панэльках – іх доля вырасла на 6 %.
Часцей за ўсё жыхары сталіцы выбіралі для пражывання Цэнтральны, Кастрычніцкі і Маскоўскі раёны. Партызанскі і Савецкі не такія папулярныя.
Цэнавы рэкорд
Самая дарагая кватэра агульнай плошчай 161,2 м², набытая ў лістападзе 2023 года, каштавала пакупніку $ 626 тыс. Яна месціцца ў доме «Ветразь» на вуліцы Кальварыйскай, 16.
СП, belsat.eu
