Прэзідэнт Францыі Эманюэль Макрон у інтэрвію тэлеканалу «France 2» прыгразіў Аляксандру Лукашэнку праблемамі за актыўны ўдзел Беларусі ў вайне Расеі супраць Украіны.
Паводле Макрона, калі Лукашэнка «вырашыць яшчэ больш прысвяціць сябе гэтай вайне, ён зробіць гэта насуперак парадзе значнай часткі свайго народу».
«Тады яму давядзецца ўзяць на сябе адказнасць, якая, я думаю, не абыдзецца для яго без праблемаў», – сказаў прэзідэнт Францыі.
Латушка правёў сустрэчы ў Берліне
Між тым прадстаўнік у справе транзіту ўлады Аб’яднанага пераходнага кабінету Беларусі Павел Латушка правёў у Берліне сустрэчы ў ведамстве канцлера, МЗС і Бундэстагу Нямеччыны, а таксама выступіў у нямецкай Радзе вонкавай палітыкі, паведамілі ў Кабінеце.
Галоўнай мэтай сустрэчаў было вызначэнне магчымых канкрэтных крокаў з боку нямецкага ўраду для захавання незалежнасці Беларусі ва ўмовах расейскай агрэсіі і рэжыму Лукашэнкі.
Гэтак, абмяркоўваліся канкрэтныя крокі для недапушчэння размяшчэння расейскіх войскаў і ядравай зброі ў Беларусі, магчымасць супрацы нямецкіх уладаў з Абʼяднаным пераходным кабінетам і стратэгія дзеянняў у дачыненні рэжыму Лукашэнкі, уключаючы санкцыі і іншы ціск.
Між тым лідарка дэмакратычных сілаў Беларусі Святлана Ціханоўская сустрэлася са старшынёй Еўрапарламенту Рабэртай Мэтсаляй. Бакі абмеркавалі прадстаўніцтва беларускіх дэмакратычных сілаў у Парламенцкай арганізацыі «Усходняга партнёрства» («Еўранэст»), а таксама ўзаемадзеянне з Еўрапарламентам.
Таксама яна выступіла перад Камітэтам Еўрапарламенту ў вонкавых справах.
Якуб Хруст belsat.eu
