Лідары краінаў «Вялікай сямёркі» плануюць супрацоўнічаць у пытанні прыцягнення да адказнасці вінаватых у інцыдэнце з прымусовай пасадкай самалёта Ryanair у Менску.
Пра гэта гаворыцца ў сумесным камюніке па выніках саміту лідараў ЗША, Вялікай Брытаніі, Нямеччыны, Італіі, Канады, Францыі і Японіі ў горадзе Карбіс-Бэй.
Краіны G7 выказалі глыбокую занепакоенасць тым, што ўлады Беларусі працягваюць напады на правы чалавека, асноўныя свабоды і міжнароднае права, ілюстрацыяй чаго стаў інцыдэнт з прымусовай пасадкай самалёта і арыштам Рамана Пратасевіча і Софʼі Сапегі.
«Мы будзем супрацоўнічаць у пытанні прыцягнення да адказнасці асобаў, якія маюць дачыненне да гэтага, у тым ліку шляхам увядзення санкцыяў, а таксама працягнем падтрымліваць грамадзянскую супольнасць, незалежныя СМІ і правы чалавека ў Беларусі», – падкрэсліваецца ў дакуменце.
«Мы заклікаем рэжым: змяніць курс і выканаць рэкамендацыі незалежнай экспертнай місіі АБСЕ ў рамках Маскоўскага механізму, распачаць змястоўны дыялог з усімі пластамі грамадства і правесці новыя свабодныя і сумленныя выбары», – гаворыцца ў камюніке.
ІІ belsat.eu
