Выданне «Позірк» паведаміла, што ў Пінску пахавалі палітвязня Мікалая Клімовіча, які памёр у калоніі. На развітанне прыехалі сваякі палітычных зняволеных, а на могілках былі самыя блізкія нябожчыка, блізу 20 асобаў.
Спачатку цела Мікалая Клімовіча прывезлі да ягонага дому. Туды сярод іншых прыйшлі развітацца сваякі пінскіх палітвязняў. Пахаванне адбылося на могілках «Таргошыцы».
«Там было каля 20 чалавек, гэта сваякі і сябры Мікалая», – паведаміла крыніца выдання «Позірк».
Пра смерць 61-гадовага Мікалая Клімовіча ў віцебскай калоніі стала вядома 7 траўня. Ён памёр праз два тыдні пасля этапавання з баранавіцкага СІЗА.
Клімовіч перанёс інсульт, меў другую групу інваліднасці праз праблемы з сэрцам. Казаў, што баіцца сканаць у зняволенні, бо мусіць прымаць лекі і быць пад сталым наглядам лекара. Нягледзячы на стан ягонага здароўя, суддзя суда Пінскага раёну і Пінску Андрэй Бычыла на прапанову пракурора Іллі Гузарэвіча прызначыў блогеру год калоніі.
Клімовіча асудзілі паводле артыкулу аб абразе Лукашэнкі. Нагодай стаўся лайк, які паставіў мужчына пад карыкатураю на палітыка ў сацсетцы «Одноклассники».
Сяргей Крот belsat.eu
