Эманюэль Макрон адмовіўся ад тэрміну «генацыд» для апісання зверстваў Расеі ва Украіне падчас інтэрв’ю тэлекампаніі «France 2», паведамляе CNN.
Таксама ён назваў братнімі народы Расеі і Украіны.
Адказваючы на пытанне ў інтэрвʼю грамадскай тэлекампаніі «France 2», ці будзе ён, як і прэзідэнт ЗША Джо Байдэн, выкарыстоўваць тэрмін «генацыд» для апісання забойстваў украінцаў расейскімі вайскоўцамі, Макрон адказаў:
«Сёння я быў бы асцярожны з такімі тэрмінамі, бо гэтыя два народы – браты».
«Я хачу працягваць спробы, наколькі магу, спыніць гэтую вайну і аднавіць мір. Я не ўпэўнены, што эскалацыя рыторыкі служыць гэтай справе. Мы можам дакладна сказаць, што сітуацыя непрымальная і што гэта ваенныя злачынствы. Мы перажываем ваенныя злачынствы, беспрэцэдэнтныя на нашай зямлі – нашай еўрапейскай зямлі», – дадаў ён.
Учора, 12 красавіка, прэзідэнт ЗША Джо Байдэн заявіў, што зверствы, якія раскрываюцца ва Украіне, кваліфікуюцца як генацыд і «робіцца ўсё ясней і ясней, што Пуцін проста спрабуе сцерці з зямлі нават ідэю існавання ўкраінцаў».
Іншыя сусветныя лідары, такія як прэмʼер-міністр Брытаніі Борыс Джонсан і прэзідэнт Польшчы Анджэй Дуда, таксама выкарыстоўвалі слова «генацыд» для апісання дзеянняў Расеі ва Украіне.
Прэзідэнт Францыі, які цяпер прэтэндуе на пераабранне, таксама адзначыў супрацу Францыі з Украінай у расследаванні меркаваных ваенных злачынстваў і дадаў, што «Расея ў аднабаковым парадку пачала надзвычай жорсткую вайну. Цяпер устаноўлена, што расейскае войска ўчыніла ваенныя злачынствы, і нам належыць знайсці вінаватых».
АД belsat.eu