З 9 кастрычніка ў Беларусі дзеіць масачны рэжым. Фотакарэспандэнты «Белсату» паглядзелі, як яго прытрымліваюцца жыхары Барысава і ў Горадні.
Улады плануюць увесці адміністратыўную адказнасць для людзей, якія ігнаруюць нашэнне масак і сацыяльную дыстанцыю ў грамадскіх месцах. Пра тое, што ўвядзенне такіх захадаў «прапрацоўваецца на ўзроўні рэспублікі», заявіла галоўная санітарная лекарка Магілёўскай вобласці Святлана Нячай.
Масачны этыкет накіраваны перадусім на тое, каб зменшыць рызыку перадачы каронавіруснай інфекцыі ад хворага чалавека. Пры гэтым маскі трэба рэгулярна мяняць і насіць іх правільна, закрываючы не толькі вусны, але і нос.
У афіцыйнай статыстыцы Міністэрства аховы здароўя па ўсёй Беларусі выяўляюць не больш за 2000 новых выпадкаў за дзень. Партал zerkalo.io атрымаў дадзеныя, паводле якіх толькі ў Менску выпадкаў захворвання на COVID-19 бывае ў паўтара раза больш.
Усяго з пачатку пандэміі COVID-19 у Беларусі, паводле Мінздароўя, захварэлі 559 715 чалавек, з іх памерлі – 4305.