Выданне «Прессбол» паведаміла пра скон свайго галоўнага рэдактара Сяргея Лісічкіна. Прычыны смерці не раскрываюцца. Лісічкін кіраваў выданнем з канца 2020 года.
«Гаротная навіна прыйшла сёння ўвечары. На 55-м годзе жыцця не стала галоўнага рэдактара «Прессбола» Сяргея Лісічкіна. Сяргей Сяргеевіч узначаліў выданне ў канцы 2020 года, змяніўшы на гэтай пасадзе выканаўцу абавязкаў галоўрэда Дзмітрыя Беленькага», – гаворыцца ў паведамленні, апублікаваным у Telegram-канале выдання 11 жніўня.
Да «Прессбола» Лісічкін працаваў карэспандэнтам на тэлеканале ОНТ, прэс-сакратаром клуба па хакеі на траве «Менск», меў супрацу з рознымі газетамі.
Спартыўнае выданне ўзначаліў у снежні 2020 года на прапанову кіраўніка Беларускай федэрацыі футбола Уладзіміра Базанава.
Пасля змены галоўнага рэдактара з «Прессбола» звольніліся больш за 10 журналістаў.
Сёлета ў чэрвені міністэрства інфармацыі заблакавала сайт выдання за архіўнае фота футбаліста з «чорнага» спіса, а таксама за навіны пра бягуху Крысціну Ціманоўскую.
Сяргей Крот belsat.eu
