Менская царква «Новае жыццё» атрымала два афіцыйныя лісты ад дзяржаўных органаў, паведамляе тэлеграм-канал «Хрысціянская візія». Раней царкву пазбавілі малітоўнага будынку і магчымасці праводзіць богаслужэнні.
Першы ліст – гэта патрабаванне аб яўцы ў інспекцыю бухгалтара і прадастаўленні некаторых фінансавых дакументаў.
Другі ліст абвяшчае аб слуханні ў судзе справы аб прызнанні інфармацыйнай прадукцыі царквы «экстрэмісцкімі матэрыяламі». Гэта можа наўпрост пагражаць нават фармальнаму юрыдычнаму існаванню гэтай рэлігійнай арганізацыі, паведамляе «Хрысціянская візія».
Канфлікт уладаў і прыхаджанаў царквы «Новае жыццё» пачаўся яшчэ ў 2005 годзе. Тады менскія чыноўнікі пастанавілі выселіць царкву з будынку, пераабсталяванага ў 1992-м з былога кароўніку. Вернікі адмовіліся пакідаць царкву, збудаваную за іхныя сродкі, і нават арганізавалі пост-галадаванне. Сітуацыя прыцягнула міжнародную ўвагу. Гарадскія чыноўнікі часова адступіліся, але затым канфлікт выбухнуў зноў. Судовыя выканаўцы дасылалі лісты, праводзілі размовы, аднак вернікі не саступалі. На месцы царквы ўлады планавалі збудаваць школу.
У лістападзе 2020 года вернікі царквы «Новае жыццё» запісалі відэа, у якім асудзілі гвалт з боку сілавікоў, непраўдзівыя сведчанні ў судах і рэпрэсіі супраць грамадзянаў Беларусі за іхныя погляды.
17 лютага 2021 года міліцыя і камунальныя службы проста выселілі царкву на вуліцу. З таго часу прыхаджане вымушаныя праводзіць набажэнствы на дварэ, на паркінгу каля забранага будынку. Улады прызналі сходы незаконнымі, вернікаў пачалі затрымліваць і штрафаваць. Рэпрэсіі і затрыманні зазнаў пастар царквы Вячаслаў Ганчарэнка.
У чэрвені гэтага году будынак царквы пачалі знасіць.
Алена Рувіна belsat.eu