Памежная ахова Польшчы паведамляе аб пабудове першых 140 км плоту на мяжы з Беларуссю. Аб гэтым установа заявіла ва ўласным Twitter. Скончыць будоўлю плануюць да канца чэрвеня.
«Першыя дабудаваныя ўчасткі плоту ўведзеныя ў эксплуатацыю. Ідзе прыёмка астатніх. Пралёты ўжо размешчаныя на даўжыні 140 км. Бліжэйшымі днямі пачнецца мантаж электроннага шлагбаума», – паведамляе Памежная ахова Польшчы.
Польскі ўрад прыняў пастанову пабудаваць плот працягласцю 180 км і вышынёй 5,5 м на мяжы з Беларуссю. Прычынай стаўся міграцыйны крызіс на мяжы. Такім чынам у Польшчы пастанавілі спыніць каналы нелегальнай міграцыі ў краіну, якія былі ініцыяваныя прадстаўнікамі рэжыму Лукашэнкі ў 2021 годзе.
Нагадаем, што беларускі рэжым спрабаваў незаконна пераправіць у Польшчу і Літву тысячы асобаў, якія адмыслова прыляцелі ў краіну з Блізкага Усходу. Праваабаронцы адзначаюць, што за паслугу ўлады Беларусі і адмыслова створаныя «агенцтвы» бралі ад 3000 долараў.
Таксама плот будзе ўключаць 22 пераходы, якія павінны даць жывёле магчымасць свабодна міграваць. Плот таксама будзе абсталяваны сістэмаю відэаназірання. Скончыць будоўлю плануюць да канца чэрвеня.
Раман Лугоўскі belsat.eu
