Віцебскі абласны савет дэпутатаў ухваліў працягненне да 1 студзеня 2025 года спагнання платы за мінанне мяжы. Адпаведную пастанову, прынятую 30 снежня, апублікавалі на Нацыянальным прававым партале.
Новая пастанова пачне дзеяць 1 лютага, а старая страціла моц 1 студзеня. Такім чынам, да канца студзеня за мінанне мяжы грошай браць не будуць.
Стаўка збору – 1 базавая велічыня. Сёлета гэта 37 рублёў.
Ад выплаты мясцовага збору вызваленыя чыноўнікі, якія едуць у выправы, замежнікі, якія будуць вяртацца з фестывалю «Славянскі базар» або пасля адпачынку ў беларускіх санаторыях.
Таксама плаціць не трэба тым, хто выязджае з краіны на лячэнне або пасля пахавання ў Беларусі сваякоў, і некаторым іншым катэгорыям грамадзянаў.
У Віцебскай вобласці ёсць міжнародныя пункты пропуску на мяжы з Латвіяй і Літвою.
Упершыню зборы за выезд за мяжу ўвялі ў Беларусі пазалетась. Тады ўлады тлумачылі, што гэтыя грошы пойдуць на «ліквідацыю наступстваў каронавіруса і на супрацьэпідэмічныя захады на мяжы».
Сяргей Крот belsat.eu