Менскага інжынера Анатоля Шалковіча, які стварыў мэм пра любоў да памідораў са смятанай, не выпусцілі на свабоду пасля 30 содняў арышту. Пра гэта паведамляе «Медиазона».
З якой прычыны ён застаецца за кратамі – невядома.
65-гадовага Анатоля Шалковіча затрымалі 11 лістапада, у дзень, калі яму споўнілася 65 гадоў. Мужчыну арыштавалі на 15 дзён паводле неназванага артыкулу. Але ў МУС заяўлялі, што ён вырабляў удома пратэставую сімволіку, якую потым «закідваў на дрэвы».
«Пакаяльнае відэа» з удзелам спадара Анатоля зрабілася мэмам: мужчына тлумачыў, што любіць спалучэнне белага з чырвоным, бо любіць памідоры са смятанай, а ягоная жонка рудая, гэта таксама белы з чырвоным.
26 лістапада яго зноў пакаралі яшчэ 15 соднямі.
Таксама не выйшаў на свабоду пасля адміністратыўнага арышту актывіст з Салігорску Павел Батуеў. Праваабаронцам стала вядома, што ўчора яго асудзілі яшчэ на 15 содняў.
Батуева затрымалі 23 лістапада. Вядома, што супраць яго была распачата крымінальная справа.
РР belsat.eu