Прэм’ер-міністр Нідэрландаў Марк Рутэ падчас саміту NATO ў Вільні пракаментаваў магчымасць спрошчанага далучэння Украіны да Паўночнаатлантычнага альянсу. Зрабіў ён гэта ў адказ на пытанне карэспандэнта «Белсату» Аляксандра Папко.
«NATO і Еўразвяз – розныя арганізацыі з розным шляхам далучэння. Таму выслаць Украіне запрашэнне далучыцца да ЕЗ падчас вайны магчыма, але ў NATO – нашмат складаней», – сказаў прэм’ер.
Паводле яго, Украіна атрымае гарантыі бяспекі на пераходны перыяд пасля канца вайны.
«Гэты перыяд не павінен быць доўгі. Украінскія войскі падрыхтуюць да сумяшчальнасці з узбраеннем і структураю камандавання краінаў NATO», – паведаміў Марк Рутэ.
Таксама ён адзначыў, што працэс падрыхтоўкі пілотаў F-16 для Украіны яшчэ не пачаўся, «але затрымкі з іх падрыхтоўкаю няма». ЗША пагадзіліся іх рыхтаваць усяго два месяцы таму, нагадаў ён.
Раней генеральны сакратар арганізацыі Енс Стольтэнбэрг заявіў, што NATO павінна дамовіцца аб спрашчэнні працэдуры далучэння Украіны і не абавязваць яе выконваць так званы План дзеянняў для падрыхтоўкі да чалецтва (ПДЧ) у альянсе.
«Украіна прайшла доўгі шлях з таго часу, як у 2008 годзе мы прынялі рашэнне, што наступным крокам перад уступленнем будзе распрацоўванне і рэалізацыя Плану дзеянняў для падрыхтоўкі да чалецтва ў NATO. Украіна значна бліжэйшая да NATO, і я мяркую, што прыйшоў час адлюстраваць гэта ў рашэннях альянсу», – заявіў Енс Стольтэнбэрг.
Ён дадаў, што будзе дадзены ясны і пераканаўчы сігнал, што Украіна зробіцца чальцом альянсу.
Якуб Хруст belsat.eu