Прэзідэнт Літвы Гітанас Наўседа 11 ліпеня падчас саміту NATO ў Вільні падкрэсліў небяспеку, якая зыходзіць з боку рэжыму ў Беларусі.
Гітанас Наўседа адзначыў, што размаўляў пра Беларусь з прэзідэнтам ЗША Джо Байдэнам. Паводле яго, Беларусь – гэта больш не незалежная дзяржава, а губерня Расеі.
«Беларусь сапраўды робіцца праблемаю. Не так, як гэта было ў 2020 годзе. У нас не павінна быць ніякіх ілюзіяў. Гэтая краіна больш не незалежная. Гэта яшчэ адна губерня Расейскай Федэрацыі. Беларуская тэрыторыя цалкам дасяжная для расейскіх войскаў, каб планаваць аперацыі супраць Украіны», – заявіў палітык.
Паводле Наўседы, размяшчэнне ў Беларусі тактычнай ядравай зброі – толькі пытанне часу. Працягваецца і выкарыстанне міграцыі.
«Усё гэта комплексна паказвае, што сітуацыя бяспекі ў нашым рэгіёне нестабільная і пагаршаецца», – сказаў прэзідэнт Літвы.
Ён спадзяецца, што пра Беларусь будзе размова на саміце.
Таксама Наўседа падкрэсліў, што неабходна ўзмацняць Сувальскі калідор, заціснуты паміж Беларуссю і Расеяй.
Якуб Хруст belsat.eu
