Пра адсутнасць лістоў і хоць нейкай інфармацыі пра зняволенага палітыка Мікалая Статкевіча ўжо на працягу 90 дзён напісала ў Фэйсбуку ягоная жонка Марына Адамовіч.
«90 бясконцых дзён… 1085 дзён за кратамі. Хутка тры гады. Як ім там жывецца? Сумленне не муляе?» – пытаецца ў пасце спадарыня Марына.
Мікалай Статкевіч знаходзіцца за кратамі ўжо больш за тысячу дзён. Ён быў затрыманы 31 траўня 2020 года ў Менску. Яго абвінавацілі ў арганізацыі масавых беспарадкаў (ч.1 арт.293 КК РБ).
14 снежня 2021 суддзя Мікалай Доля агучыў прысуд Мікалаю Статкевічу: 14 гадоў зняволення ў калоніі асаблівага рэжыму.
20 чэрвеня 2022 быў этапаваны з гомельскага СІЗА-3 у глыбоцкую калонію № 13. Адміністрацыя папраўчай установы паставіла яго на ўлік як схільнага да экстрэмізму.
Палітыку 66 гадоў.
Таксама ўжо доўгі час няма звестак пра палітвязняў Ігара Лосіка, Максіма Знака, Сяргея Ціханоўскага, Аляксандра Францкевіча, Дзмітрыя Дубоўскага. Праваабарончы цэнтр «Вясна» раней паведамляў, што іх трымаюць у ШІЗА.
Дагэтуль незразумела, у якім стане знаходзіцца Віктар Бабарыка.
Марыя Міхалевіч belsat.eu
