10 траўня ў італьянскім горадзе Турыне прайшоў першы паўфінал музычнага конкурсу «Еўрабачанне-2022». Удзел у ім узялі 17 краінаў, сярод пераможцаў – Украіна.
Пераможцы першага паўфіналу:
- Арменія: Роза Лін з песняй «Snap»;
- Грэцыя: Аманда Тэнф’юр з песняй «Die Together»;
- Ісландыя: гурт «Systur» з песняй «Með Hækkandi Sól»;
- Літва: Моніка Лю з песняй «Sentimentai»;
- Малдова: «Zdob şi Zdub» & «Advahov Brothers» з песняй «Trenulețul»;
- Нідэрланды: «S10» з песняй «De Diepte»;
- Нарвегія: «Subwoolfer» з песняй «Give That Wolf A Banana»;
- Партугалія: спявачка MARO з песняй «Saudade, Saudade»;
- Украіна: «Kalush Orchestra» з песняй «Stefania»;
- Швейцарыя: Мар’юс Бэр з песняй «Boys Do Cry».
Пакуль што невядома, якая краіна набрала найбольш балаў ад журы і гледачоў.
Не прайшлі першы этап конкурсу Аўстрыя, Албанія, Балгарыя, Данія, Латвія, Славенія, Харватыя.
«Еўрабачанне» мае два паўфіналы, па выніках кожнага з іх у фінал праходзяць 10 краінаў-удзельніц, а таксама 5 краінаў-заснавальніц конкурсу – Францыя, Нямеччына, Іспанія, Вялікая Брытанія і Італія.
Музычны конкурс «Еўрабачанне-2022» стартаваў 8 траўня. Удзел у ім бяруць 40 краінаў. Другі паўфінал пройдзе 12 траўня. Фінал адбудзецца ў суботу, 14 траўня.
Беларусь і Расея сёлета ў «Еўрабачанні» не ўдзельнічаюць. Еўрапейскі трансляцыйны звяз выключыў Расею з конкурсу на наступны дзень пасля ўварвання расейскіх войскаў ва Украіну. Пасля гэтага Расея сама выйшла з ЕТЗ.
Беларусі адмовілі ва ўдзеле яшчэ ў 2021 годзе за тэкст песні ўдзельнікаў, які парушаў правілы «Еўрабачання».
ГГ, belsat.eu
