Генеральная пракуратура для вызначэння падсуднасці перадала ў Вярхоўны Суд справу супраць Франка Вячоркі, якога пераследуюць праз механізмы спецыяльнага вядзення.
У прэс-рэлізе паведамляецца, што намеснік генеральнага пракурора, накіроўваючы крымінальную справу ў суд, выставіў Франку Вячорку пазоў у інтарэсах дзяржавы аб пакрыцці маёмаснай шкоды ў суме больш за 30,9 млн рублёў.
Спецыяльнае вядзенне супраць Франка Вячоркі, старэйшага дарадцы абранай прэзідэнткі Беларусі Святланы Ціханоўскай, было распачатае ў лютым 2024 года.
Яму было выстаўленае абвінавачанне адразу паводле 9 артыкулаў Крымінальнага кодэксу:
- здрада дзяржаве;
- змова з мэтай захопу дзяржаўнай улады;
- публічныя заклікі да захопу дзяржаўнай улады, здзяйснення акту тэрарызму і іншых дзеянняў, накіраваных на прычыненне шкоды нацыянальнай бяспецы Рэспублікі Беларусь;
- дыскрэдытацыя Рэспублікі Беларусь;
- стварэнне і кіраванне экстрэмісцкім фармаваннем, у тым ліку паўторна;
- распальванне іншай сацыяльнай варожасці і разладу;
- арганізацыя масавых беспарадкаў;
- арганізацыя групавых дзеянняў, якія груба парушаюць грамадскі парадак;
- паклёп у дачыненні прэзідэнта.
Нагадаем, механізм спецыяльнага вядзення дазваляе ўладам Беларусі судзіць апанентаў завочна, калі тыя застаюцца за мяжой.
Глеб Нержын belsat.eu
