Франак Вячорка пра завочны суд над сабой: «Абвінавачаннямі можна толькі ганарыцца»
Генеральная пракуратура перадала ў Вярхоўны суд справу супраць Франака Вячоркі, галоўнага дарадцы абранай прэзідэнткі Святланы Ціханоўскай. Яму выставілі дзевяць крымінальных артыкулаў і пазоў на амаль 31 млн рублёў. Вячорка пракаментаваў «Белсату» завочны суд над сабою.
Франак Вячорка не ставіцца да гэтай навіны як да сур’ёзнага суда: кажа, суддзі ў рэжыме Аляксандра Лукашэнкі – гэта «губазікаўцы ў мантыях», якія проста выконваюць даручэнні зверху. Маўляў, будзе ад начальніка загад «упаяць па максімуму», вось і выконваюць. Пра законнасць ці справядлівасць у такім судзе, упэўнены ён, ніякай гаворкі няма.
«Завочныя суды, завочныя арышты, завочныя штрафы – гэта ўсё пасмех з правасуддзя. Рэжым стаў пасмехам у вачах міжнароднай супольнасці, – кажа Франак Вячорка. – Ясна, што гэтыя завочныя суды не нясуць вялікай шкоды тым, хто ў бяспецы. Пра каго трэба рэальна непакоіцца, гэта пра тых, хто ў Беларусі і адбывае рэальныя тэрміны ў лукашэнкаўскіх турмах. Пра іх мы мусім думаць і за іх вызваленне мусім змагацца кожны дзень».
Яго ўразіла сума пазову ў інтарэсах дзяржавы аб пакрыцці маёмаснай шкоды – больш за 30,9 млн рублёў. Вячорка пытае, адкуль узялі такія лічбы: «Можа быць, маральныя пакуты Лукашэнкі ці ягоных губазікаўскіх галаварэзаў?»
Сума, як і самое «спецыяльнае вядзенне» ды будучы суд, завочная, адзначае ён. У яго ў Беларусі няма чаго канфіскоўваць на такую суму. Пытае: «Можа, адправяць на катаргу да канца жыцця?»
«Вядома, у гэтым судзе няма нічога новага, – дадае ён. – Доўга яны нараджалі гэтую справу. Але, як кажуць, гара нарадзіла мыш. Цэлы спіс артыкулаў, абвінавачанняў, якімі можна толькі ганарыцца».
Супраць Вячоркі выставілі абвінавачанні паводле такіх артыкулаў:
- здрада дзяржаве;
- змова з мэтай захопу дзяржаўнай улады;
- публічныя заклікі да захопу дзяржаўнай улады, здзяйснення акту тэрарызму і іншых дзеянняў, скіраваных на прычыненне шкоды нацыянальнай бяспецы Рэспублікі Беларусь;
- дыскрэдытацыя Рэспублікі Беларусь;
- стварэнне і кіраванне экстрэмісцкім фармаваннем, у тым ліку паўторна;
- распальванне іншай сацыяльнай варожасці і разладу;
- арганізацыя масавых беспарадкаў;
- арганізацыя групавых дзеянняў, што груба парушаюць грамадскі парадак;
- паклёп у дачыненні прэзідэнта.
Нічога новага Франак Вячорка для сябе не бачыць у плане вышуку: ён даўно ў вышуку і Лукашэнкі, і Расеі, і ў міждзяржаўным вышуку СНД. Хіба не выключана, што паспрабуюць зрабіць запыт праз Інтэрпол, але ж Еўразвяз ужо не прымае да разгляду запытаў ад Лукашэнкі і Расеі, дый пасля інцыдэнту з «Бі-2» у Тайландзе многія іншыя краіны адмовяцца ад супрацы з Расеяй паводле лініі Інтэрполу, які «для дыктатараў відавочна інструмент рэпрэсіяў, а не пошуку рэальных злачынцаў».
Вячорка дадае: рэальныя злачынцы – гэта Лукашэнка і Пуцін, а Інтэрпол, спадзяецца Вячорка, неўзабаве стане пагрозай для самога Лукашэнкі і ягонага атачэння.
Алесь Наваборскі belsat.eu
