Мітрапаліт Беларускай праваслаўнай царквы Веніямін забараніў служыць святару Аляксандру Кухту і Георгію Рою. Забарона накладзеная на падставе канонаў Святой Царквы ў сувязі з пераходам святароў у юрысдыкцыю Канстанцінопальскага патрыярхату.
Вядома, што 30-гадовы іерэй Аляксандр Кухта, які вёў папулярны праваслаўны канал «Батюшка ответит» (каля 48 тысяч падпісантаў), а таксама 44-гадовы протаіерэй Георгій Рой з Горадні вымушаныя былі з’ехаць у Літву праз пераслед уладамі Беларусі.
У Літве святары звярнуліся да Патрыярха Канстанцінопальскага Варфаламея з просьбай прыняць іх пад сваю юрысдыкцыю. Яны заявілі, што з меркаванняў сумлення не могуць заставацца ў юрысдыкцыі Маскоўскага патрыярхату. На мінулым тыдні ім ухвалілі прашэнне аб пераходзе ва Усяленскі патрыярхат.
Яны абодва ў 2020 годзе асудзілі фальсіфікацыю выбараў і масавыя рэпрэсіі, а ў 2022-м – вайну ва Украіне.
Алена Рувіна belsat.eu
