«Вясна» зрабіла інструкцыю, што рабіць, калі ў ІЧУ/ЦІП наблыталі дату вызвалення арыштанта
Апошнім часам праваабаронцы выяўляюць шмат «памылак» у датах вызвалення ў спісах Жодзіна: асуджаныя маглі выйсці пазней нават на 10 сутак. Каб такога не адбылося, пасля суда неабходна правяраць дату выхаду ў спісах ІЧУ/ЦІП або самім патэлефанаваць туды і ўдакладніць, паведамляе «Вясна».
Таксама праваабаронцы раяць весці аўдыёзапіс судовага працэсу, каб мець доказы рашэння суддзі.
Дату выхаду ў спісах выстаўляюць згодна з судовай пастановай. Калі яна не супадае – значыць дапушчана памылка ў пастанове або ў самім ІЧУ/ЦІП, ці ўвогуле маглі таемна асудзіць па новым пратаколе і дата выхаду напісана правільна.
Што рабіць, калі заўважылі несастыкоўкі:
– патэлефанаваць у канцылярыю суда і ўдакладніць рашэнне суда;
– патэлефанаваць ці прыехаць у ІЧУ/ЦІП на Акрэсціна і растлумачыць сітуацыю. Яны пераправераць дадзеныя і ў выпадку памылкі – выправяць самастойна;
– калі там паведамяць, што памылкі няма, а дадзеныя былі дакладна перададзеныя судом, то вам трэба ўзяць пастанову суда і з ёй прыехаць у ГАУС/ЦІП для рашэння гэтай праблемы. Пастанову суда можа атрымаць толькі адвакат, або сваяк, які выступаў на судзе сябе ў якасці абаронцы. Нагадваем пра ініцыятыву па пошуку адвакатаў avocado.help, каб мець магчымасць атрымаць юрыдычную дапамогу;
– калі Вы ці Вашыя блізкія ўсё ж такі ўтрымліваліся незаконна ў ІЧУ/ЦІПе, і не было магчымасці дамагчыся вызвалення ў патрэбны тэрмін, то пасля выхаду вам неабходна напісаць скаргу аб незаконным утрыманні.
А што будзе, калі гэтага не рабіць?
Важна дамагацца выпраўлення даты вызвалення ў спісах загадзя, таму што могуць узнікнуць праблемы, напрыклад, з пошукам адваката або пастановай суда, а тады арыштаванаму прыйдзецца адбыць лішнія суткі.
МГМ, belsat.eu
