Тры гады «хіміі» тэатральнаму гукааператару, тры месяцы гаўптвахты салдату. Рэпрэсіі за 11 студзеня

У Беларусі ні на дзень не спыняецца палітычны пераслед: затрыманні, ператрусы, суды і прысуды. «Белсат» пераказвае, што адбылося за адзін толькі дзень 11 студзеня.

Не спыняюцца затрыманні за падпіскі і каментары. Юрыст раіць, што рабіць, калі па вас прыйшлі

23-гадовага гукааператара Тэатру юнага гледача Кірыла Салеева асудзілі на 3 гады калоніі-пасялення (фактычна, «хімія») за «арганізацыю дзеянняў, якія груба парушаюць грамадскі парадак» (ч. 1 арт. 342 КК РБ), піша Беларуская рада культуры. Яго затрымалі 14 верасня 2021 года, абвінавацілі ва ўдзеле ў маршах 27 верасня і 25 кастрычніка 2020 года, суддзя Наталля Бугук прызнала яго вінаватым, але адпусціла дамоў да набыцця прысудам моцы. У асобную справу вылучаная позва «Менсктрансу» на 96 860 руб. 46 кап.

Яшчэ аднаго палітвязня перавялі на «хатнюю хімію»

Салдата тэрміновай службы Антона Бароўскага асудзілі на тры месяцы гаўптвахты вайсковай камендатуры паводле той жа ч. 1 арт. 342 КК РБ, піша «Вясна». Яго абвінавацілі ва ўдзеле ў пратэстах 10 і 11 жніўня на праспекце Пераможцаў у Менску, у выхадзе на дарогу і блакаванні руху машынаў. Суддзя Алена Капцэвіч прызнала доказамі ягонай віны здымкі з ягонай старонкі ў сацсетцы.

«Прызначылі адказнай за добры настрой». Ірына Слаўнікава распавяла пра перабыванне ў СІЗА

Перадалі ў пракуратуру крымінальную справу супраць Марфы Рабковай, Андрэя Чапюка, Акіхіра Гаеўскага-Ханады, Аляксандра Францкевіча, Аляксея Галаўко, Аляксандра Казлянка, Паўла Шпетнага, Мікіты Дранца, Андрэя Марача і Данілы Чуля, паведаміў Следчы камітэт. Іх вінавацяць паводле 10 крымінальных артыкулаў, ад «Злоснага хуліганства» і «Апаганьвання будынкаў» да «Стварэння злачыннай арганізацыі» і «Заклікаў да дзеянняў на шкоду нацыянальнай бяспецы».

СК назбіраў на анархістаў справу за 15 гадоў і на 10 артыкулаў Крымінальнага кодэксу

Адбыў пакаранне і выйшаў на волю палітвязень Васіль Пілец, пішуць праваабаронцы «Вясны». Яго асудзілі за «Хуліганства» (арт. 339 КК РБ) спачатку на «хатнюю хімію», але пасля пратэсту пракурора – на год «хіміі». Справа тычылася таго, што ў снежні 2020 года ён штурхануў агрэсіўных прыхільнікаў Лукашэнкі, калі тыя зафарбоўвалі выяву бел-чырвона-белага сцяга. Пакаранне ён адбываў у ваўкавыскай папраўчай установе адкрытага тыпу № 29.

У вёсцы Ткачы Пружанскага раёну зноў затрымалі актывістку Алену Гнаўк. Прычыны затрымання невядомыя, але перад гэтым яна пісала ў Viber: калі не выйдзе на сувязь, то яе затрымалі «за ўмовы адбывання пакарання ў межах апошняй адміністратыўнай справы за мяхі на плоце» (раней яе затрымлівалі за штосьці, што выглядала як ручнікі, развешанае на плоце «па схеме БЧБ»). Пазней сваякі пацвердзілі: яна атрымала 15 дзён арышту за «парушэнне парадку адбывання пакарання», да 25 студзеня яна будзе ў Пружанскім ІЧУ. Увесну 2021 года Алене Гнаўк прысудзілі два гады «хатняй хіміі» па «карагоднай справе» за нібыта «Арганізацыю і рыхтаванне дзеянняў, якія груба парушаюць грамадскі парадак», летам-2021 дадалі яшчэ год «хатняй хіміі» за «Абразу прэзідэнта».

Беларускія ўлады не дапусцілі дзвюх лыжніц да міжнародных спаборніцтваў праз палітыку

АА, АС belsat.eu

Падпісвайся на telegram Белсату

Hавiны