Міністэрства аховы здароўя Беларусі змяніла сваю пастанову ад 9 снежня 2019 года № 115 «Аб выкарыстанні сродкаў сямейнага капіталу на атрыманне медычнай дапамогі». Як паведамляе партал Pravo.by, адпаведная пастанова № 167 была прынятая 26 кастрычніка.
Дакумент уводзіць патрабаванне, каб у заключэнні лекарскай кансультацыйнай камісіі пры датэрміновым выкарыстанні сродкаў сямейнага капіталу ўказваліся віды платных медычных паслугаў, якія неабходна аказаць пацыенту.
Таксама арганізацыі аховы здароўя будуць абавязаныя вяртаць у «Беларусбанк» нявыкарыстаныя грошы, пералічаныя на атрыманне грамадзянінам платных медычных паслуг, у тэрмін:
- не пазней за 60 каляндарных дзён з моманту іх паступлення на разліковы рахунак арганізацыі аховы здароўя, калі іх не выкарысталі цалкам на пратэзаванне зубоў, дэнтальную імплантацыю з наступным пратэзаваннем;
- не пазней за 360 каляндарных дзён з моманту іх паступлення на разліковы рахунак арганізацыі аховы здароўя, калі іх не выкарысталі цалкам на артадантычную карэкцыю прыкусу.
Пастанова набывае моц праз 20 дзён пасля афіцыйнага апублікавання.
З 2015 году сямейны капітал прызначаюць пры нараджэнні ці ўсынаўленні трэцяга дзіцяці. Спачатку яго памер складаў 10 тысячаў долараў, але з 2020 года яго прызначаюць у рублях. На гэты момант яго памер складае 29 950 рублёў, або трохі больш за 9 тысяч долараў.
Якуб Хруст belsat.eu
