Памежны камітэт Беларусі ў сваім афіцыйным тэлеграм-канале распавядае, што ноччу 10 лістапада ў лагеры ўцекачоў на беларуска-польскай мяжы былі знойдзеныя чацвёра мужчын са слядамі фізічнага гвалту.
Збітыя мігранты, паводле беларускіх памежнікаў, – курды. Пацярпелыя нібыта распавялі, што іх затрымалі на тэрыторыі Польшчы. Мяркуючы па траўмах, польскія сілавікі з прымяненнем сілы выцеснілі мігрантаў за агароджу назад у Беларусь, робіць выснову Памежны камітэт.
У той жа час Польскае радыё Беласток паведамляе, што ўвечары 9 лістапада з тэрыторыі Беларусі ў Польшчу трапілі дзве вялікія групы мігрантаў. У ваколіцах Крынак і Белавежы групы як мінімум з некалькіх дзясяткаў замежнікаў прарвалі агароджу.
Новага штурму мяжы мігрантамі польская паліцыя чакае 11 лістапада, на Дзень незалежнасці Польшчы. Прэс-сакратар урада Польшчы Пётр Мюлер падкрэсліў, што зараз на польскай мяжы знаходзіцца ад 3000 да 4000 чалавек, а ў Беларусі не менш за некалькі тысяч чалавек гатовы перайсці польскую мяжу.
ГГ, belsat.eu