Лік ахвяраў землятрусу ў Марока дасягнуў 2012. 2059 чалавек пацярпелі, з іх 1404 знаходзяцца ў цяжкім стане, паведамляе «Reuters» са спасылкаю на ўлады. МЗС Беларусі другія содні не паведамляе, ці маюцца беларусы сярод загінулых і параненых.
Магнітуда падземных штуршкоў склала 6,8. Эпіцэнтр знаходзіўся ў 70 км на паўднёвы захад ад Маракеша.
Больш за ўсё людзей загінулі ў цяжкадаступных горных раёнах Высокага Атласа, у Маракешы і пяці правінцыях вакол эпіцэнтра землятрусу. У раёне Асні пашкоджаныя амаль усе дамы, жыхарам давялося начаваць на вуліцы. Людзям не стае харчоў і іншых неабходных рэчаў. Наступствы землятрусу закранулі 300 тысячаў чалавек, падлічыла Сусветная арганізацыя аховы здароўя.
Паводле апошніх дадзеных уладаў, лік ахвяраў дасягнуў 2012, 2059 пацярпелі, з іх 1404 знаходзяцца ў крытычным стане.
Міністэрства замежных справаў Беларусі другія содні не паведамляе, ці маюцца беларусы сярод загінулых і параненых.
Трывае ратавальная аперацыя. У пацярпелыя раёны вязуць пітную ваду, харчы, намёты і коўдры, дадаецца ў паведамленні.
У краіне абвешчаная трохдзённая нацыянальная жалоба.
Гэта самы трагічны землятрус у Марока з 1960 года, калі загінулі найменей 12 тысячаў чалавек.
Сяргей Крот belsat.eu
