Што менавіта абразіла, засакрэцілі: зачытвалі на закрытай частцы працэсу.
У Кобрынскім судзе 9 жніўня агучылі вырак берасцейскаму палітвязню Віталю Зарадзею, расказвае берасцейскае аддзяленне праваабарончага цэнтру «Вясна».
Віталь Зарадзей падаваў у канцылярыі судоў позвы, дзе, паводле экспертызаў, «дапускаў негатыўную ацэнку» суддзяў і Аляксандра Лукашэнкі. Гэта адбывалася 28 верасня, 15 і 30 кастрычніка, 7 і 17 снежня 2020 года, 14 студзеня і 9 сакавіка 2021 года. Зарадзея затрымалі 29 сакавіка.
У чым заключаліся абразы, невядома: частку паседжання, дзе яны агучваліся, зрабілі закрытай. Вядома толькі, што Зарадзей не прызнаў віну.
«Вясна» адзначае, што пракурор у час працэсу назваў абцяжарвальнымі абставінамі тое, што Зарадзей нібыта мае непагашаную судзімасць, хоць напраўду судзілі яго ўпершыню. З цытаты пракурора выглядае, што ён вырашыў асобна разглядаць першую заяву і ўсе астатнія, а таксама вырашыў, што за першую Зарадзей ужо асуджаны, хоць гэта не так.
Пацярпелымі ў справе назвалі восем суддзяў: гэта Аляксей Карагода, Пётр Баброўскі, Таццяна Пракапчук, Анастасія Бразінская, Андрэй Глушко, Алена Кавальчук і Алена Карпава (на працэс ніхто з іх не прыйшоў). Дзяржаўнае абвінавачванне прадстаўляў Аляксандр Шыкавецкі, суддзём быў Вадзім Здановіч.
Вырак такі: за «абразу прэзідэнта» (ч.1 арт. 368 КК РБ) паўтара года пазбаўлення волі і за «абразу суддзі» (арт. 391 КК РБ) – 2 гады абмежавання волі без накіравання ў папраўчую ўстанову, што сумарна дала больш жорсткае пакаранне, два гады калоніі агульнага рэжыму.
Зарадзея прызналі палітычным зняволеным яшчэ 8 красавіка – разам з чатырма іншымі беларусамі, якіх асудзілі за «абразу суддзі» ці «абразу прадстаўніка ўлады» на абмежаванне волі на «хіміі».
АА belsat.eu