Беларусы будуць абавязаныя паведамляць пра атрыманне замежнага грамадзянства ці дазволу на жыхарства
Абавязак падачы ў дзяржаўныя органы інфармацыі пра атрыманне замежнага грамадзянства ці ВНЖ замацаваны ў абноўленым «Законе аб грамадзянстве» Рэспублікі Беларусь, які бярэ сілу 11 ліпеня. Пра гэта паведаміў начальнік Дэпартаменту грамадзянства і міграцыі МУС Беларусі Аляксей Бягун.
Грамадзяне Беларусі з 11 ліпеня будуць абавязаныя паведамляць у беларускія дзяржаўныя органы пра атрыманне грамадзянства іншай дзяржавы, віду на жыхарства або іншага дакументу, які дае льготы і перавагі ў сувязі з палітычнымі або рэлігійнымі поглядамі ці нацыянальнай прыналежнасцю.
«Цяпер мы атрымліваем шматлікія звароты наконт таго, навошта і з якой мэтай гэтая норма ўводзіцца. Маўляў, вы што, збіраецеся абмежаваць нашыя правы? На самой справе закон «Аб грамадзянстве» Рэспублікі Беларусь у гэтым плане непахісны: за грамадзянінам Беларусі не прызнаецца іншага грамадзянства. То бок тыя асобы, якія атрымалі грамадзянства і дазвол на жыхарства ў замежнай дзяржаве, у любым выпадку для нас ёсць грамадзянамі Рэспублікі Беларусь з усім комплексам правоў і абавязкаў, прадугледжаных для іх Канстытуцыяй і законам Рэспублікі Беларусь», – зазначыў Аляксей Бягун.
Паводле чыноўніка, інфармацыя пра наяўнасць у грамадзяніна дакументаў іншай краіны патрэбная пры прыняцці рашэння аб прызначэнні на дзяржаўную службу або на пасаду, праца на якой звязаная выключна з прыналежнасцю да грамадзянства Рэспублікі Беларусь. Акрамя таго, такая інфармацыя патрэбная для статыстычнага збору, каб ацэньваць мабільнасць беларусаў і з мэтай фармавання адпаведнай міграцыйнай палітыкі.
Пакуль што паведамляць пра ВНЖ ды іншыя дакументы замежнай дзяржавы трэба ў добраахвотным парадку цягам трох месяцаў з моманту іх атрымання. Санкцыі за непаведамленне не прадугледжаныя. Разам з тым улады маюць намер паглядзець, як беларусы будуць выконваць гэтае палажэнне і пры неабходнасці могуць быць уведзеныя санкцыі. Інфармацыю пра замежнае грамадзянства і ВНЖ можна падаць праз МУС, МЗС і праз электронны партал дзяржаўных паслугаў.
«Калі актыўнасць грамадзянаў будзе не вельмі высокая, то ў любым выпадку Міністэрства замежных справаў унясе прапановы дзеля таго, каб неяк стымуляваць грамадзянаў накіроўваць у наш адрас адпаведнае апавяшчэнне: ці ўвядзенне адпаведнай адказнасці, ці прызначэнне пэўных кантрольных мерапрыемстваў у дачыненні гэтых асобаў, якія маюць адпаведныя дакументы», – сказаў Бягун і выказаў надзею, што беларусы будуць добраахвотна выконваць патрабаванні абноўленага закону.
Паводле новага закону, ахвочыя атрымаць беларускае грамадзянства будуць абавязаныя скласці прысягу. Калі прэтэндэнт адмаўляецца ад прысягі, гэта можа стаць падставай для адмовы ў грамадзянстве.
Таксама абавязковым пры атрыманні грамадзянства стане пісьмовы тэст на ўзровень валодання адной з дзяржаўных моваў Беларусі.
Марыя Міхалевіч belsat.eu
