«Беларускі бок ведае прычыны». У Польшчы пракаментавалі рэкордныя чэргі легкавікоў на мяжы
7–8 красавіка ў Берасці ўтварыліся велічэзныя чэргі перад пунктам пропуску «Варшаўскі мост»: афармлення чакалі 500 легкавых аўтаў. Каб трапіць у Польшчу, даводзілася чакаць 60 гадзінаў. «Белсат» папрасіў Памежную ахову суседняй краіны пракаментаваць сітуацыю.
На пачатку красавіка на беларуска-польскай мяжы ўтварыліся вялікія чэргі аўтобусаў, час чакання дасягаў амаль содняў. У тыя дні ў чарзе, паводле Дзяржаўнага памежнага камітэту Беларусі, было ажно да 45 аўтобусаў. Сёння, дарэчы, гэтак сама: цяпер іх 45.
8 красавіка перад «Варшаўскім мостам» назбіралася 500 легкавікоў – такой чаргі, бадай, ніколі там не было. Час чакання перавышаў 30 гадзінаў. Цяпер у чарзе – «усяго» 280 аўтаў.
Раней прэс-сакратар Надбужанскага аддзелу Памежнай аховы Польшчы, у склад якога ўваходзіць пункт пропуску ў Тэрэспалі, Дар’юш Сеніцкі тлумачыў аўтобусныя чэргі міграцыйным крызісам. З гэтай жа прычыны ўтварылася і чарга з легкавікоў, пацвердзіў ён у каментары «Белсату» 10 красавіка:
«Чарговы раз раптоўныя, непрадбачаныя падзеі, што непасрэдна ўзніклі ў выніку міграцыйнага ціску на польска-беларускай мяжы, запатрабавалі дынамічных і рашучых захадаў, у тым ліку перасоўвання асабовых рэсурсаў памежнікаў на ахову гэтак званай зялёнай мяжы».
Палякі працягваюць дэталёвы дагляд падарожнікаў у Тэрэспалі, што вымагае больш высілкаў і часу:
«У сувязі з недастатковай аховай дзяржаўнай мяжы з беларускага боку мы таксама абавязаныя ладзіць больш дэталёвыя правяранні асобаў, якія заязджаюць у Польшчу, да таго часу, пакуль не спыніцца рэальная пагроза нелегальнай міграцыі».
Сеніцкі пры гэтым запэўніў, што польскі бок рэгулярна інфармуе беларускіх калегаў – адпаведна, тыя ведаюць сапраўдныя прычыны чэргаў:
«Беларускі бок шторазу інфармуем па тэлефоне аб сітуацыі, такім чынам, ён мае поўнае ўяўленне аб прычынах падаўжэння часу чакання на мінанне мяжы. Гэтыя дзеянні, звязаныя з аховай дзяржаўнай мяжы, сталі рэакцыяй на пагрозы нелегальнай міграцыі на польска-беларускай мяжы».
Сёння Памежная ахова Польшчы паведаміла пра перадухіленне спробы парушэння мяжы з Беларуссю групаю, у якой было 220 мігрантаў. Тыя паводзіліся агрэсіўна, кідалі ў польскіх памежнікаў камяні і галлё.
У чатах, дзе беларусы абмяркоўваюць мінанне мяжы, ва ўсіх бедах памылкова абвінавачваюць палякаў: маўляў, марудна працуюць. Насамрэч адказнасць за чэргі нясуць улады Беларусі.
Увосень 2021 года Польшча закрыла пункт «Кузніца Беластоцкая» (з беларускага боку – «Брузгі» ў Гарадзенская вобласці) пасля штурму гэтага пераходу мігрантамі. Летась у лютым у адказ на вырак журналісту і аднаму з лідараў польскай дыяспары Анджэю Пачобуту перастаў працаваць пункт «Баброўнікі – Бераставіца».
Улады Беларусі дасюль не ловяць мігрантаў, якія, спрабуючы трапіць у ЕЗ у абыход пунктаў пропуску, парушаюць не толькі межы суседніх краінаў, але, уласна, і беларускую мяжу таксама. Пачобут дагэтуль за кратамі. Вялікія чэргі на мяжы, як выглядае, – цяпер сталая праблема для беларусаў.
Сцяпан Кубік belsat.eu
