Прэзідэнтка Вугоршчыны Каталін Новак заявіла, што сыходзіць у адстаўку ў суботу 10 лютага, паведамляе «Reuters». Прычынай яе сыходу стала ўзмацненне ціску з боку апазіцыі і грамадзянскай супольнасці ў сувязі з памілаваннем чалавека, асуджанага за ўтойванне сексуальнага гвалту ў дзіцячым прытулку.
Каталін Новак – блізкая паплечніца кансерватыўнага прэм’ер-міністра Вугоршчыны Віктара Орбана. У красавіку 2023 года яна памілавала каля 20 чалавек, сярод якіх быў намеснік дырэктара дзіцячага дому, які дапамагаў утойваць факты педафіліі ў прытулку.
«Я зрабіла памылку… Сёння апошні дзень, калі я звяртаюся да вас як прэзідэнт», – сказала Новак, абвяшчаючы аб сваёй адстаўцы падчас трансляцыі на дзяржаўным тэлебачання.
Апазіцыя заклікала Новак сысці з пасады прэзідэнткі яшчэ раней.
46-гадовая Каталін Новак займала пасаду прэзідэнткі ў Вугоршчыне менш за два гады, з 10 мая 2022 года. Яна была першай жанчынай, якая займала такую пасаду ў гэтай краіне. Прэзідэнта ў Вугоршчыне абірае парламент.
Зміцер Міраш belsat.eu