«Кожны раз дадатковыя моманты». Эміль Чэчка распавёў, як штодня пад піва расстрэльваў па 20 мігрантаў
У Менску 10 лютага прайшла прэс-канферэнцыя польскага дэзерціра Эміля Чэчка, які ў снежні 2021 года ўцёк у Беларусі. Вайсковец распавёў, як уласнаручна расстраляў пад дзве сотні мігрантаў. У Беларусі ў дачыненні да яго за гэта ніякіх крымінальных справаў не пачалі.
На прэс-канферэнцыі Эміль Чэчка распавёў, што «браў непасрэдны ўдзел» у масавых забойствах мігрантаў. Паводле яго, яго прывезлі на мяжу 6 чэрвеня. Там ён штодня піў, ужываючы па 6-8 банак піва.
Першае злачынства, як заявіў Чэчка, учыніў ужо 8 чэрвеня нейкі «Лысы Томэк», які на ягоных вачах застрэліў затрыманага чалавека.
З 9 па 18 чэрвеня Чэчка, паводле ягоных жа словаў, з сябрам штодня расстрэльваў прыблізна па 20 чалавек у розных месцах. Але, на яго думку, колькасць забітых можа быць большай – ад 200 да 700 чалавек.
19 чэрвеня Чэчку вывезлі з мяжы.
Пасля словаў Чэчкі кіраўнік праўладнага цэнтру «Сістэмная праваабарона» Дзмітрый Белякоў паведаміў, што чуе ад дэзерціра «кожны раз дадатковыя моманты».
Хто такі Белякоў?
У каментарах да жывой трансляцыі з прэс-канферэнцыі Эміля Чэчкі праўладнага «праваабаронцу» Дзмітрыя Белякова вырашыў выкрыць праўладны ж прапагандыст Аляксей Аўдонін або чалавек, які хаваўся пад ягоным імем.
«Добры дзень! я жыў з Беляковым Дзімам у адной казарме. З 2003 па 2011 Белякоў Дзімка служыў старшым афіцэрам аддзела ў в/ч 15738. Потым перайшоў у ААЦ, дзе праслужыў на такой жа пасадзе да 2014. Бялякоў Дзімка вучыўся ў Інстытуце нацыянальнай бяспекі. Гэта «прадаўжальнік» вышэйшых курсаў КДБ пры СМ СССР, а пасля набыцця незалежнасці – пры КДБ РБ. У 2015 годзе Дзімка Белякоў прыцёрся ў Еўраопт на пасаду начальніка бяспекі. У сакавіку 2019 г. Белякоў становіцца дырэктарам Таварыства з абмежаванай адказнасцю «Эміральд Кансалтынг». Праз гэтую кампанію ён атрымаў грошы на фінансаванне «Сонар-2050». Белякоў – кадравы афіцэр КДБ».
Паводле Аўдоніна, Бялякоў павінен быў шукаць аўтараў для сайта «Сонар-2050».
«Ён атрымаў 500 тысяч долараў на дзейнасць сайта. Але ўсіх кінуў. Ад яго адвярнуліся ўсе паплечнікі: Аляксандра Шпакоўскі і Аляксей Дзермант», – напісаў чалавек з нікам «Авдонин Алексей».
Паводле яго, «Белякову даручылі весці Рамана Пратасевіча і гэтага паляка. У іх адзін куратар у КДБ».
Сам Аўдонін пазней зняпраўдзіў сваю датычнасць да гэтых каментароў, звінаваціўшы ва ўсім «злосныя сілы» і «дэструктывы». Адзначым, што падобныя звесткі пра Белякова раней публікавала выданне Reform.by.
- Вайсковец 16-й Паморскай механізаванай дывізіі Узброеных сілаў Польшчы Эміль Чэчка дэзерціраваў у Беларусь 16 снежня нібыта праз сваю нязгоду з палітыкай Польшчы ў дачыненні да мігрантаў.
- У Польшчы яго абвінавачваюць у шпіянажы. Супраць яго распачалі крымінальную справу па артыкуле аб дэзерцірстве.
- Апроч таго, у верасні 2021 года польскі суд прызнаў Эміля Чэчку вінаватым у псіхалагічным і фізічным гвалце над маці ў траўні. За гэта яго прыгаварылі да шасці месяцаў абмежавання волі, забаранілі ўжываць алкаголь і забаранілі набліжацца да маці на адлегласць менш за 50 метраў. У снежні гэты прысуд быў пацверджаны судом апеляцыйнай інстанцыі.
- Таксама Чэчку абвінавацілі ў кіраванні ў стане алкагольнага або наркатычнага апʼянення 11 снежня – менш чым за тыдзень да ўцёкаў у Беларусь.
- «Тое, што ў мяне былі праблемы, звязаныя з маёй маці, гэта праўда. Тое, што я лячыўся ад алкагольнай залежнасці, гэта таксама праўда», – сказаў ён у эфіры беларускага дзяржаўнага тэлеканалу ОНТ.
- Пасля таго, як у студзені 2022 года стала вядома пра прызнанні дэзерціра беларускаму СК пра масавыя расстрэлы, у Міністэрстве абароны Польшчы яму параілі лекавацца ў псіхіятра.
ПС belsat.eu
