Расейскі аўтарынак у 2023 годзе вырас на 69 %. Усяго за мінулы год у РФ было прададзена амаль 1060000 новых легкавых аўтамабіляў, паведамляе «Автостат» са спасылкай на дадзеныя сістэмы рэгістрацыі аўтамабіляў.
Лідарам расейскага рынку засталася Lada. Усяго было прададзена 324,4 тысяч машын гэтай маркі, што на 85,7 працэнта больш, чым у 2022 годзе.
Другім на расейскім рынку стаў кітайскі брэнд Chery, чые продажы выраслі ў 3 разы да без малога 119 тысяч аўтамабіляў, трэцім быў Haval, які павялічыў збыт у 3,3 разы да 111,72 тысяч машын.
Чацвёртае месца дасталася кітайскай марцы Geely. Яе продажы за год выраслі ў 3,5 разы да 93,5 тысяч аўтамабіляў. Доля рынку за год вырасла больш як у два разы да 8,84 %. Трэба адзначыць, што большая частка афіцыйна прадаваных у РФ новых аўтамабіляў Geely вырабляецца ў Беларусі на сумесным прадпрыемстве «БелДжы».
Усяго ў першай дзясятцы брэндаў расейскага аўтарынку шэсць кітайскіх марак.
Беларуская аўтамабільная асацыяцыя пакуль не публікавала звестак аб дылерскіх продажах новых легкавых аўтамабіляў па выніках 2023 года ў Беларусі.
Ася Саковіч, belsat.eu