Журналісты тэлеканала «Настоящее Время» прааналізавалі звесткі, якія атрымалі ад «Киберпартизан» і прыйшлі да высновы, што ў Беларусі з сакавіка 2020 году да сакавіка 2021 году ад каронавіруса залішняя смяротнасць склала 32 тысячы.
Група хакераў «Киберпартизаны» заявіла, што атрымала дадзеныя з усімі персанальнымі звесткамі беларусаў – інфармацыйнай сістэмы «Пашпарт». Хакеры падзяліліся з «Настоящим Временем» дадзенымі 1,4 млн беларусаў, якія памерлі са студзеня 2010-га па сакавік 2021 года. Журналісты прааналізавалі гэтыя звесткі і вызначылі залішнюю смяротнасць ад каронавіруса ў Беларусі.
Афіцыйна, паводле звестак Мінздароўя, у 2020 годзе памерлі ад каронавіруса 1424 пацыенты. Журналісты прыйшлі да высновы, што ў 2020 годзе залішняя смяротнасць у Беларусі склала 25 тысячаў. Гэта ў 17 разоў больш, чым паказалі беларускія ўлады.
Залішняя смяротнасць з канца сакавіка 2020 да канца сакавіка 2021-га склала 32 тысячы чалавек. Гэта ў 14,4 разы больш, чым сведчаць афіцыйныя дадзеныя.
Падобныя лічбы раней агучваў Андрэй Елісееў, дырэктар даследаванняў у даследчым цэнтры «Цэнтр EAST». Эксперт адзначыў, што паказнік смяротнасці мог быць заніжаны ажно ў 15 разоў, а колькасць памерлых у выніку пандэміі ў 2020 годзе можа перавышаць 20 тыс. чалавек. Гэта, на ягоную думку, адпавядае прагнозу, зробленаму яшчэ ў сакавіку на падставе формулы Лонданскага імперскага форуму. Тады смяротнасць для Беларусі прадказвалася ў межах 16–32 тыс. выпадкаў.
СК belsat.eu