Пазняк заклікаў беларускіх вайскоўцаў «вызваляць Беларусь ад акупацыі прамаскоўскага рэжыму»
Лідар Кансерватыўна-хрысціянскай партыі БНФ Зянон Пазняк звярнуўся з адозвай да жаўнераў і афіцэраў Беларускага войска. Тэкст звароту апублікаваны на сайце КХП-БНФ.
Паводле Пазняка, у выпадку, калі Аляксандр Лукашэнка пашле беларускіх вайскоўцаў на вайну супраць Украіны, у іх будзе тры шляхі:
- «Ганебны і самагубчы для Вас і для гонару нашай краіны» – падпарадкавацца, ступіць на Украіну са зброяй і забіваць украінцаў на іхнай зямлі, «і таксама прыняць ад іх сваю бессэнсоўную смерць».
- Падняць белы сцяг і перайсці на бок украінцаў. «Вы будзеце абароненыя міжнароднымі законамі. Гэта не палон. Адмова ад чужой маскоўскай несправядлівай вайны, адмова быць агрэсарам, адмова ваяваць з суседам забяспечыць Вам статус жыцця ў любой краіне ААН альбо магчымасць (хто пажадае) ваяваць супраць рашысцкага мордара на баку ўкраінцаў у беларускіх вайсковых аддзелах».
- «Шлях герояў і патрыётаў Айчыны» – «перагрупавацца, павярнуць назад і пайсці на Менск вызваляць Беларусь ад акупацыі прамаскоўскага рэжыму».
На думку Пазняка, Расея разлічвае, што «нематываванае беларускае войска амаль гарантавана будзе панішчана і разбіта ўкраінцамі і тады пры ўсіх раскладах і паваротах Масква можа захапіць Беларусь голымі рукамі», бо «бараніць краіну не будзе каму».
Украінскія вайскоўцы мініруюць небяспечныя кірункі на мяжы з Беларуссю, паведамляе Камандаванне аб’яднаных сілаў ЗСУ з прычыны наведвання камандуючым Сяргеем Наевым пазіцыяў украінскіх вайскоўцаў у Паўночнай аператыўнай зоне – каля мяжы з Беларуссю.
Паводле Наева, цяпер праходзіць мініраванне небяспечных кірункаў і добраўпарадкаванне інжынерных агароджаў. Падраздзяленні Дзяржаўнай памежнай службы Украіны ўмацоўваюць дзяржмежы краіны на ўсіх небяспечных і пагрозлівых кірунках.
Якуб Хруст belsat.eu
