ЗША і 10 краінаў Еўропы заклікалі да новых санкцыяў супраць уладаў Беларусі – за нелегальную міграцыю
Таксама заклікалі забараніць палёты рэйсаў, якімі мігранты трапляюць у Беларусь. Сітуацыю параўноўваюць з прымусоваю пасадкаю самалёта «Ryanair».
Старшыня Камітэту замежных справаў Сейму Латвіі Рыхардс Колс апублікаваў у Twitter супольную заяву прадстаўнікоў камітэтаў замежных справаў Злучаных Штатаў, Вялікай Брытаніі, Ірландыі, Латвіі, Літвы, Нямеччыны, Польшчы, Украіны, Францыі, Чэхіі ды Эстоніі.
Яны асудзілі выкарыстанне нелегальнай міграцыі рэжымам Аляксандра Лукашэнкі для перашкодаў суседнім краінам. Выкарыстанне такіх метадаў яны назвалі ганебным, крымінальным і бесчалавечным актам і параўналі гэта з травеньскім актам паветранага пірацтва:
«Мы заклікаем забараніць палёты ў Беларусь, якія, як мяркуюць, выкарыстоўваліся для арганізаванага дзяржаваю трафіку людзей. Мы заклікаем да санкцыяў адносна ўцягнутых у гэты арганізаваны дзяржаваю трафік людзей праз міжнародныя межы і адносна рэжыму Лукашэнкі, які кантралюе гэта».
Таксама ў заяве заклікалі падтрымаць еўрапейскую памежную службу «Frontex» ды іншыя нацыянальныя і міжнародныя агенцыі, што могуць падтрымаць Літву ды іншыя краіны ў сітуацыі з нелегальнаю міграцыяй. Акрамя таго, у дакуменце заклікалі NATO і Еўразвяз супольна звярнуцца да ўрадаў Іраку і Турэччыны, а таксама іншых дзяржаваў, якія рэжым Лукашэнкі выкарыстоўвае дзеля знявагі і інструменталізацыі мігрантаў.
АА belsat.eu
