«Белсат» падводзіць вынікі 471-х содняў поўнамаштабнай вайны, распачатай Расеяй ва Украіне. Пра галоўныя падзеі станам на вечар 9 чэрвеня чытайце ў нашым аглядзе.
У ноч на 9 чэрвеня Узброеныя сілы РФ здзейснілі чарговы масіраваны абстрэл тэрыторыі Украіны. Гэтым разам для атакі выкарыстоўваліся крылатыя ракеты паветранага базавання Х-101/Х-555, а таксама ўдарныя дроны «Shahed-136/131» і «Ланцэт». Запускі БПЛА ажыццяўляліся з паўднёвага кірунку, ракетаў – з ваколіцаў Каспійскага мора.
Агулам сілы супрацьпаветранай абароны Украіны збілі 4 ракеты і 10 беспілотнікаў. Між тым частка паветраных цэляў дасягнулі сваіх мэтаў, ёсць пацярпелыя сярод цывільнага насельніцтва і разбурэнні інфраструктуры.
У гэты ж час расейцы працягнулі наземныя аперацыі на ўсходзе Украіны, засяродзіўшы свае асноўныя намаганні на ліманскім, бахмуцкім, аўдзееўскім і мар’інскім кірунках у Луганскай і Данецкай вобласцях. Па інфармацыі Генеральнага штабу Збройных сілаў Украіны, цягам содняў на вышэйзгаданых кірунках адбыліся 43 баявыя сутыкненні. Пры гэтым інтэнсіўнасць баявых дзеянняў істотна адрознівалася ў залежнасці ад канкрэтнага ўчастку фронту.
Сіверскі і слабажанскі кірункі (украінска-расейскае памежжа)
Украінскі бок фіксуе мінамётныя і артылерыйскія абстрэлы памежных населеных пунктаў Сумскай і Харкаўскай вобласцяў.
Расейскі бок паведамляе пра падобную сітуацыю на тэрыторыі Белгародскай вобласці РФ.
Тэлеграм-канал «Romanov Лайт», спаслаўшыся на свае крыніцы, піша, што праўкраінскія сілы рыхтуюцца да штурму населенага пункту Нехацееўка ў Шабекінскім раёне Белгародчыны.
Купянскі кірунак (паўночна-ўсходняя частка Харкаўскай вобласці і паўночны захад Луганскай)
Аналітыкі праекту Deepstate пішуць пра працяг пазіцыйных баёў каля Масютаўкі. У гэты ж час фіксуецца зняцце з кірунку асобных падраздзяленняў УС РФ.
Ліманскі кірунак (паўднёвы захад Луганскай вобласці і поўнач Данецкай)
Генштаб ЗСУ паведамляе пра няўдалыя наступальныя дзеянні праціўніка каля населенага пункту Вясёлае ў Данецкай вобласці. Зменаў у лініі фронту не зафіксавана.
Бахмуцкі кірунак (аднайменны раённы цэнтр і ягоныя ваколіцы)
У Deepstate пішуць пра баі каля каналу Северскі Данец – Данбас і побач з асноўнымі вышынямі на поўначы ад Кляшчэеўкі.
Расейскі ваенкор Сямён Пегаў гаворыць, што ўкраінскія вайскоўцы праводзілі штурмавыя дзеянні каля Бярхоўкі і Дубова-Васільеўкі. На паўднёвым захадзе ад Бахмуту ЗСУ прасунуліся да Кляшчэеўкі.
Генштаб ЗСУ паведамляе пра няўдалыя контратакі войскаў РФ каля Арэхава-Васільеўкі, Іванаўскага, Ступачкаў і Белай Гары.
Намесніца Міністра абароны Украіны Ганна Маляр заявіла, што расейцы сцягваюць рэзервы на бахмуцкі кірунак, намагаючыся ўтрымаць свае пазіцыі.
Аўдзееўскі кірунак (на поўначы ад Данецку)
Украінчкае камандаванне піша пра безвыніковыя спробы расейцаў наступаць каля Севернага і Вопытнага.
Deepstate фіксуе чарговую няўдачу УС РФ на поўдні ад Первамайскага.
Прарасейскія крыніцы паведамляюць, што ЗСУ рыхтуюцца наступаць на Вопытнае з мэтай заняць населены пункт і выйсці да рубяжу Розаўка – Новабахмутаўка. Акрамя гэтага плануецца атака па лініі Новакалінавае – Новабахмутаўка. Такім чынам украінскі бок плануе вярнуць раней страчаныя пазіцыі, ліквідаваць пагрозу атачэння Аўдзееўкі, а таксама выйсці да заходніх ускрайкаў Данецку.
Мар’інскі кірунак (на захадзе ад Данецку)
Узброеныя сілы РФ атакуюць у заходняй частцы Мар’інкі. Пакуль ЗСУ ўдаецца трымаць пазіцыі.
Шахцёрскі кірунак (паўднёва-ўсходні ўчастак фронту ў Данецкай вобласці)
Сямён Пегаў піша пра штурмавыя дзеянні з боку ЗСУ каля Няскучнага. Артылерыйскія абстрэлы фіксуюцца ўздоўж усёй лініі сутыкнення.
Запарожскі кірунак (лінія фронту ў аднайменным рэгіёне і на паўднёвым захадзе Данецкай вобласці)
Цягам содняў ЗСУ наступалі на арэхаўскім участку ў Запарожскай вобласці: штурмавыя групы намагаюцца прарваць расейскую абарону на рубяжы Рабоціна – Вербавае. Тэлеграм-канал «Рыбарь» паведамляе, што ўночы ўкраінцам удалося выбіць праціўніка з перадавых пазіцыяў, але артылерыя і авіяцыя УС РФ не дазволілі ім замацавацца.
Ранкам баі на гэтым участку фронту ўзнавіліся, і ЗСУ выбілі войскі РФ з часткі пазіцыяў каля Рабоціна.
У гэты ж час спробы ЗСУ замацавацца ў сяле Лабковае пакуль не прыносяць выніку: населены пункт знаходзіцца ў так званай шэрай зоне.
Між тым Ганна Маляр адмаўляе пачатак украінскага контрнаступу на поўдні, называючы ўкраінскія атакі пад Арэхавам пазіцыйнымі баямі.
У Deepstate адзначаюць, што расейцы падцягваюць свае рэзервы да так званага ўрэмеўскага выступу (на мяжы Запарожскай і Данецкай вобласцяў).
Херсонскі кірунак (лінія фронту ў аднайменным рэгіёне і на Кінбурнскай касе ў Мікалаеўскай вобласці)
У Херсонскай вобласці працягваецца эвакуацыя цывільнага насельніцтва з падтопленых тэрыторыяў. Таксама абодва бакі канфлікту абменьваюцца артылерыйскімі ўдарамі.
Па інфармацыі Генштабу ЗСУ, цягам содняў было знішчана каля 1010 расейскіх вайскоўцаў, у выніку чаго агульныя беззваротныя страты РФ дасягнулі 213 770 чалавек.
Ва ўмовах актыўных баявых дзеянняў журналісты не маюць магчымасці аператыўна правяраць афіцыйныя паведамленні ўдзельнікаў вайны.
Таццяна Міронава belsat.eu
