Фонд салідарнасці BYSOL зрабіў выплаты 200 сем’ям палітвязняў са сродкаў, сабраных падчас марафону «Нам не ўсё адно». Пра гэта паведаміў кіраўнік фонду Андрэй Стрыжак. Агульная сума выплатаў склала 100 тысяч еўраў – гэта ўся сума, якая была выдзеленая BYSOL пасля марафону.
Андрэй Стрыжак прывёў наступныя факты і лічбы, датычныя выплатаў:
- кожная з заявак, атрыманых падчас марафону, была падтрыманая на суму 500 еўраў;
- выплатамі падтрымлівалі як тых палітвязняў, хто яшчэ ў турмах, так і тых, хто вызваліўся з іх;
- усе, хто не трапіў пад выплаты ў межах марафону, атрымалі дапамогу з уласных рэсурсаў фонду;
- фонд нічога не ўзяў з грошай, сабраных падчас марафону, на адміністратыўныя выдаткі – яны былі пакрытыя з уласных рэсурсаў.
Выплаты былі правераныя прадстаўніцай нагляднай рады марафону дырэктаркай парталу Zerkalo.io Аляксандрай Пушкінай, зазначае кіраўнік BYSOL.
Раней дапамогу сем’ям палітвязняў пералічвалі і паспяхова прайшлі аўдыт праваабарончая арганізацыя Dissidentby (атрымала і выплаціла 14 тысяч ераў), фонд «Краіна для жыцця» (18 тысяч еўраў), Фонд дапамогі беларусам у Літве Razam (28 800 еўраў), Беларуская рада культуры (9500 еўраў), дабрачынная арганізацыя Littouwin LIONS CLUB (15 тысяч еўраў), медыяпраект «Палітвязынка» (5000 еўраў).
Онлайн-марафон салідарнасці з беларускімі палітычнымі зняволенымі «Нам не ўсё адно» прайшоў 29–30 ліпеня 2023 года. Акцыю зладзілі больш за 20 незалежных медыяў, у тым ліку «Белсат». Гасцямі супольнага эфіру сталі беларускія палітыкі і актывісты, спартоўцы, музыкі і творцы. Падчас марафону на падтрыманне палітвязняў і іхных сем’яў было сабрана больш за 550 тысяч еўраў.
На пачатку кастрычніка 2023 года МУС і Следчы камітэт Беларусі паведамілі аб завядзенні крымінальнай справы паводле ч. 2 арт. 361-2 КК («Фінансаванне экстрэмісцкай дзейнасці») у дачыненні арганізатараў і ўдзельнікаў марафону.
Марыя Міхалевіч belsat.eu
