«Выглядае добра і пачуваецца бадзёра». Палітзняволенай Ірыне Слаўнікавай дазволілі сустрэчу з бацькамі
Палітзняволенай Ірыне Слаўнікавай дазволілі сустрэцца з бацькамі пасля разгляду апеляцыі ў Вярхоўным Судзе. Яны распавялі, што дачка верыць у хуткую перамогу справядлівасці.
У Вярхоўным Судзе 6 снежня разгледзелі апеляцыю журналісткі TVP Ірыны Слаўнікавай (і пакінулі вырак без зменаў), а пасля дазволілі ёй сустрэчу з бацькамі. Яна падзякавала за падтрымку ўсім блізкім, знаёмым і калегам. Яна верыць, што хутка справядлівасць возьме верх.
Бацькі Ірыны распавялі ейнаму мужу, што выглядае яна добра і пачуваецца бадзёра. Яна перакананая ў сваёй невінаватасці і ў тым, што яе зняволенне − гэта палітычны пераслед за журналісцкую дзейнасць.
Напярэдадні, 7 снежня, муж Ірыны Аляксандр Лойка звярнуўся ў лісце да Офісу Ціханоўскай з просьбай распачаць перамовы з рэжымам дзеля вызвалення палітвязняў. Ён мяркуе, што дэмакратычныя сілы не наблізілі Беларусь да развязання гэтай праблемы.
У жніўні суддзя Гомельскага абласнога суда Мікалай Доля прыгаварыў Слаўнікаву да 5 гадоў калоніі паводле абвінавачвання ў арганізацыі дзеянняў, што груба парушаюць грамадскі парадак, і ва ўдзеле ў экстрэмісцкім фармаванні.
Сяргей Крот belsat.eu
