Урад Брытаніі накіруе ва Украіну дадатковую ваенную дапамогу. Гэтым разам гаворка ідзе пра контрбатарэйныя радыёлакацыйныя сістэмы, абсталяванне для глушэння GPS, прыборы начнога бачання і інш. Выданне The Guardian паведамляе, што брытанскі прэм’ер Борыс Джонсан паведаміў, што краіна гатовая выдаткаваць 1,6 млрд долараў з уласных рэзерваў.
Варта адзначыць, што гэта самы высокі ўзровень вайсковых выдаткаў Брытаніі з часу войнаў у Іраку і Афганістане. Сваё рашэнне аб дадатковай дапамозе Лондан агучыў пасля сустрэчы кіраўнікоў краінаў G7.
Борыс Джонсан заявіў, што брутальная агрэсія Уладзіміра Пуціна не толькі прыводзіць да незлічоных разбурэнняў ва Украіне – яна таксама пагражае міру і бяспецы ва ўсёй Еўропе.
«Крывавая атака Пуціна не толькі выклікае безліч разбурэнняў ва Украіне, яна таксама пагражае міру і бяспецы ва ўсёй Еўропе. Вялікая Брытанія была першай краінай, якая прызнала маштаб пагрозы і адправіла зброю, каб дапамагчы ўкраінцам абараніцца. Мы будзем адстойваць гэтыя намаганні, працуючы з нашымі хаўруснікамі, каб гарантаваць, што Украіна працягне адбіваць расейскае ўварванне і выстаіць як свабодная і дэмакратычная краіна», – сказаў Джонсан.
У канцы гэтага месяца Джонсан правядзе сустрэчу з прадстаўнікамі галоўных абаронных кампаніяў, каб абмеркаваць павелічэнне вытворчасці ў адказ на рост попыту, выкліканага вайной ва Украіне.
ЗХ belsat.eu
