Лідарка дэмакратычных сілаў Беларусі Святлана Ціханоўская запісала відэазварот да прэзідэнта Украіны Уладзіміра Зяленскага, у якім заклікала яго не разлічваць на Лукашэнку як на міратворца.
«Лукашэнка спрабуе прабрацца на перамовы і выдаць сябе за міратворца, а не суагрэсара Пуціна. Але ад імя беларусаў на перамовах маюць гаварыць сапраўдныя прадстаўнікі народу. А Лукашэнка і ягоныя пасобнікі павінны быць прыцягнутыя да адказнасці за свае злачынствы – і перад беларусамі, і перад украінцамі.
Я бачыла на фотаздымках вашыя вочы, калі вы былі ў Бучы. І разумею, які боль назаўсёды застаецца ў сэрцы ад страты кожнага суайчынніка. Дык не разлічвайце, што міратворцам можа быць чалавек, які даўно забыўся на гэты боль», – сказала ў прамове Ціханоўская.
Раней Святлана Ціханоўская заклікала міжнародную супольнасць запатрабаваць поўнага вываду расейскіх войскаў з Беларусі. Тады яна заявіла, што расейскіх войскаў не мусіць быць ні ў Беларусі, ні ва Украіне, асабліва пасля пабачаных здымкаў з Бучы.
АД belsat.eu