У чарнавы варыянт 13-га санкцыйнага спісу супраць Расеі, які Еўразвяз мае прыняць да другой гадавіны расейскага ўварвання ва Украіну 24 лютага, трапіла беларуская кампанія «Пеленг», якая распрацоўвае і вырабляе оптыка-электронную прадукцыю. Пра гэта паведамляе радыё «Свабода» са спасылкай на свае крыніцы ў Бруселі.
«Пеленг», які вырабляе вырабляе оптыка-электронную прадукцыю вайсковага і цывільнага прызначэння, сярод іншага пастаўляе камплектуючыя для вытворчасці расейскай артылерыі і ваеннай тэхнікі (напрыклад, бронетранспарцёраў БТР-82А).
Прадпрыемства ўжо знаходзіцца пад санкцыямі ЗША, Вялікай Брытаніі і Украіны.
Таксама ў санкцыйным спісе апынуўся нарадзінец Беларусі Васіль Шурпанаў, які з’яўляецца генеральным дырэктарам «Ніжагародскага машынабудаўнічага заводу», што займаецца распрацоўкай артылерыйскіх і ракетных сістэмаў, у тым ліку зенітных ракетных комплексаў С-300.
Агулам у новы санкцыйны спіс трапілі 63 асобы і 55 арганізацыяў, адказных «за дзеянні дзеля падрыву або пагрозы тэрытарыяльнай цэласнасці, суверэнітэту і незалежнасці Украіны». Спіс яшчэ можа быць дапоўнены.
Еўрапейскі парламент 8 лютага прыняў рэзалюцыю ў пытанні Беларусі. Дэпутаты хочуць, каб Еўразвяз і краіны-чальцы ўвялі больш жорсткія санкцыі супраць рэжыму і ў дачыненні асобаў, адказных за сур’ёзныя парушэнні правоў чалавека.
Якуб Хруст belsat.eu
