Лілія Ананян, Таццяна Біруля, Аляксандр Біруля, Аляксандр Міхайлаў і Галіна Міхальчук увайшлі сёння ў спіс вязняў сумлення, паведамляе «Вясна».
Лілія Ананян была ўзятая пад варту за маляванне герба Пагоня, астатнія асобы – за паклёп ці абразу Аляксандра Лукашэнкі.
«У сувязі з павелічэннем колькасці выпадкаў асуджэння і пазбаўлення волі грамадзянаў краіны па шэрагу дыфамацыйных артыкулаў Крымінальнага кодэксу Рэспублікі Беларусь, а таксама ў сувязі са знявагай дзяржаўных сімвалаў Рэспублікі Беларусь, мы, прадстаўнікі беларускай праваабарончай супольнасці патрабуем спыніць пераслед правамерных формаў выказвання меркаванняў,
і ў чарговы раз пацвярджаючы свае неаднаразова выказаныя патрабаванні па дэкрыміналізацыі дыфамацыі і недапушчальнасці пазбаўлення волі грамадзян за абразу службовых асобаў, дзяржавы, дзяржаўных органаў і сімвалаў», – падкрэсліваюць праваабаронцы ў агульнай заяве.
На 8 лютага ў Беларусі афіцыйна прызнана 1040 чалавек палітычнымі зняволенымі.
МГМ belsat.eu